Almaty Máslıhatynyń kezekten tys XVIII sesıasy ótip, onda depýtattar birqatar mańyzdy máselelerdi qarady. Bul sesıada kóshelerdiń ataýyn ózgertý, kadr máseleleri jáne salyq salasyndaǵy burynǵy sheshimderge ózgerister engizildi, dep habarlaıdy almaty-akshamy.kz
Kóshelerdiń jańa ataýlary
Sesıa barysynda depýtattar Almaty qalasynyń birqatar kóshelerine jańa ataýlar berý jáne qaıta ataý jónindegi usynystardy qoldady. Iý. K. Tımırázev kóshesinen Iý. Gagarın atyndaǵy dańǵyldyń bir bóligi Ermek Serkebaevtyń esimimen ataldy, al Áýezov aýdanyndaǵy Iýbıleınaıa kóshesi Vladımır Tolokonnıkovtyń esimimen ataldy. Bostandyq jáne Túrksib aýdandaryndaǵy ataýsyz kóshelerge Eskendir Hasanǵalıev pen Iýrıı Pomeransev esimderi berildi.
Tanymal tulǵalar týraly
- Ermek Serkebaev – Abaı atyndaǵy Qazaq memlekettik akademıalyq opera jáne balet teatrynyń solısi, Qazaqstannyń halyq ártisi. Ol qazaq, orys jáne basqa tilderde halyq ánderin, romanstardy, klasıkalyq jáne keńestik shyǵarmalardaǵy basty operalyq partıalardy oryndap, tanymal boldy.
- Vladımır Tolokonnıkov – Qazaqstannyń eńbek sińirgen ártisi, M. Lermontov atyndaǵy memlekettik akademıalyq orys drama teatrynyń akteri, Almatyda qyryqtan astam fılmge túsken.
- Eskendir Hasanǵalıev – Qazaqstannyń halyq ártisi, ánshi jáne kompozıtor, «Anaǵa sálem» jáne «Gúlsezim» sıaqty tanymal ánderdiń avtory.
- Iýrıı Pomeransev – Qazaqstannyń halyq ártisi, akter, rejıser jáne pedagog, «Bizdiń súıikti dáriger» fılminiń arqasynda tanymal boldy.
Salyq salasyndaǵy ózgerister
Sesıa barysynda Máslıhat depýtattary "Almaty qalasy ákimdiginiń personaldy quramyn kelisý týraly" 2022 jylǵy 9 jeltoqsandaǵy №199 sheshimine ózgerister engizý týraly sheshim qabyldady. Sonymen qatar, 2020 jylǵy 9 qazandaǵy "Aýyl sharýashylyǵy maqsatyndaǵy paıdalanylmaıtyn jerlerge jer salyǵynyń bazalyq mólsherlemesin arttyrý týraly" №489 sheshiminiń kúshi joıyldy.
Qazaqstan Salyq Kodeksiniń 509-babyna sáıkes, paıdalanylmaıtyn aýyl sharýashylyǵy jerleri úshin jer salyǵynyń bazalyq mólsherlemesin 10 esege deıin kóterýge múmkindik berilgen bolatyn. Alaıda, jańa redaksıada bul mólsherleme avtomatty túrde 20 esege deıin ulǵaıtyldy.
Bul sheshim Almaty qalasy Qoǵamdyq keńesi men Almaty qalasy kásipkerler palatasynyń "Atameken" QR UKP otyrysynda qaralyp, ashyq normatıvtik quqyqtyq aktilerdiń ınternet-portalynda jarıalandy. Qoǵamdyq talqylaý barysynda usynystar men eskertýler túsken joq.