Almaty qalalyq Kardıologıa ortalyǵynda júrek-qantamyr júıesin dıagnostıkalaý jáne emdeý úshin ınovasıalyq biregeı ota jasaldy. Naqtyraq aıtsaq, almatylyq hırýrgter alǵash ret júrektiń Gıs býdasynyń sol aıaǵyna elektrodtar ornatty. Bul tyń ádis standartty emdeý tıimdiligi tómen bolǵan jaǵdaıda júrek jumysyn jaqsartýǵa baǵyttalǵan. Sheberlik dárisin tanymal polshalyq kardıohırýrg Iasek Gaıek ótkizdi.
– Bul ádis ásirese, bradıkardıa, kardıomıopatıa jáne júrek jetkiliksizdigimen aýyrǵan qart naýqastarǵa tıimdi. Ornatylǵan elektrod arqyly júrektiń qaǵysy da retteledi. Biz mundaı operasıany 2014 jyldan beri jasap kelemiz. Naýqastardyń 78%-y osyndaı em alyp jatyr. Men ótkizgen sheberlik sabaǵy qazaqstandyq dárigerler úshin paıdaly boldy dep oılaımyn, – dedi bir kúnde bes naýqasqa biregeı operasıa jasaǵan Iasek Gaıek.
Elektrod ornatylyp, operasıa aıaqtalǵannan keıin pasıent tekserýden ótedi jáne oǵan kiriktirilgen qosymshasy bar arnaıy smartfon beriledi. Ol qurylǵy kúni boıy naýqastyń densaýlyǵy týraly aqparat jınaıdy jáne óńdelgen málimetti dárigerge jóneltedi.
Iá, dárigerler júrekke ornatylǵan elektrod arqyly endi naýqastyń qaı jerde ekendigine qaramastan odan alysta otyryp-aq densaýlyǵyn baqylaı alady. Al júrek qaǵysy ádettegiden jańylǵan jaǵdaıda dereý dárigerge habarlama jiberiledi. Bul óz kezeginde der shaqta shuǵyl qadamdar jasaýǵa jol ashady.
– Bul ádis ótkizý qabileti buzylǵan pasıentter úshin óte tıimdi. Implantasıa prosedýrasy atrıaldy fıbrıllásıa sıaqty keıbir asqynýlardyń damý qaýpin azaıtady. Júreginde aqaýy bar naýqastar arasynda jas pasıentter de az emes búginde. Qalaı desek te bul tyń ádis otadan keıin kelesi kúni-aq úıge oralýǵa múmkindik beredi. Eń bastysy – smartfon qurylǵyny árqashan ózińizben birge alyp júrý, – deıdi biregeı otaǵa qatysqan qalalyq Kardıologıa ortalyǵynyń arıtmology Jalolhon Tursynhanov.