Sel qaýpi bar kezeńde 19 beket te jumys isteıdi
Almaty mańyndaǵy qaýip tóndirýi múmkin degen 12 morenalyq jáne muzdyq kólge tekseris jasaldy, dep habarlaıdy Almaty-akshamy.kz Almaty.tv-ge silteme jasap.
Josparǵa sáıkes onyń jeteýinde bıyl sý deńgeıin tekserý, artyq sýdy azaıtý jumystary júrgiziletin bolady. Sý deńgeıin tekserý jumystary bıyl ádettegiden bir aıǵa kesh bastaldy. TJD habarlaýynsha, oǵan taýly aımaqtaǵy aýa temperatýrasynyń tómen bolýy sebep. Endi búginnen bastap qyrkúıektiń ortasyna deıin tótenshelikter men arnaıy mamandar birigip muzdy kólderdi baqylaýda ustamaq.
Tikushaq teńiz deńgeıinen 3600 metr bıik jatqan kól mańyna qondy. Áýe kóliginen túse salǵanda transformatorǵa uqsaıtyn dúńgirshekter kózge túsedi. Mamandardyń aıtýynsha, bul - sel qaýipsizdigin avtomatty túrde baqylaıtyn qurylǵy.
«Bul apparat taýdaǵy kólderdiń deńgeıin, sý temperatýrasyn, muzdyqtardan erip kelgen sý shyǵynyn, Almatydaǵy dıspecherlik pýnktke, "Qazseldenqorǵaý" mekemesi jáne TJM-ǵa sıfrlyq túrde aqparat berip otyrady», – dedi «Qazseldenqorǵaý» MM qalalyq basqarmasynyń basshysy Samat Dáýlenhanov.
Taý bókterinde 31 stansa bar. Biraq soǵan qaramastan morenalyq kóldi baqylaýǵa arnaıy mamandar da jumyldyrylady. Al olar sý deńgeıin reıkamen ólshep otyrady.
«Reıkamen sý deńgeıin qarap otyrady. Bul qazyq emes, reıka. Negizi sýdyń deńgeıi dál qazir qatty kóterile qoımaǵan. Negizi deńgeıi 1-2 metrge kóteriledi. Biz sony qadaǵalaımyz. Kóterilse sýdy sıfon qubyrlary arqyly tómen túsiremiz», – dedi «Qazseldenqorǵaý» MM qyzmetkeri Ulan Jumaev.
Sel júrý qaýpin boldyrmas úshin ornatylǵan dachık sýdyń temperatýrasyn ólsheıdi.
«Qazirgi kezde bul jerde temperatýra 3-4 gradýsty ǵana qurap otyr. Biz kúnde qarap otyrmyz. Kúndelikti ızotermany baqylap otyrmyz. Izoterma - mańyzdy qural. Eger ızoterma 5 myńnan joǵary shyǵyp ketip, ol 10 kún ustaıtyn bolsa sel qaýpi tónedi degendi bildiredi», – dedi TJD bastyǵynyń orynbasary Erlan Álibekov.
TJD ókiliniń aıtýynsha, morenalyq kóldegi sýdyń qazirgi deńgeıi qaýip tóndirmeıdi. Biraq mamandar tıisti jumystardy josparǵa saı júrgize beredi. Sel qaýpi bar kezeńde 19 beket te jumys isteıdi.