Sońǵy jyldary halyqtyń tabysy birtindep ósti
Halyqtyń tabysyn arttyrý baǵdarlamasynyń jurtqa tıgizgen paıdasy shamaly. Bul týraly Memleket basshysy Qasym-Jomart Toqaev Úkimettiń keńeıtilgen otyrysy barysynda aıtty, dep habarlaıdy Almaty-akshamy.kz.
Keńeıtilgen otyrysta Prezıdent azamattardyń tabysyn arttyrý jáne adam kapıtalyn damytý máselesine toqtaldy.
«Sońǵy jyldary halyqtyń tabysy birtindep ósti. Byltyr bul ósim 5% shamasynda boldy. Biraq Almaty, Atyraý, Qyzylorda, Mańǵystaý jáne Túrkistan oblystarynda jurttyń tabysy ortasha respýblıkalyq deńgeıge jetpeıdi. Bul kórsetkish Almaty jáne Shymkent qalalarynda da tómen. Al, Qyzylorda oblysynda halyqtyń tabysy tipti azaıyp ketti. Bıyl mamyr aıynda azamattardyń naqty tabysynyń kórsetkishi mınýs 2,9 % boldy. Mundaı quldyraý kópten beri bolǵan emes», – dedi Qasym-Jomart Toqaev.
Sonymen qatar ol azamattardyń tabysyn arttyrý baǵdarlamasyn paıdasyz dep atady.
«Halyqtyń tabysyn arttyrý baǵdarlamasy qabyldandy. Biraq onyń jurtqa tıgizip jatqan paıdasy shamaly. Eń aldymen, jergilikti jerlerde tıimdi jumys júrgizilýi kerek. Ákimder jyl saıyn árbir 10 myń turǵynǵa 100 jańa jumys ornyn ashýǵa tıis. Meniń bilýimshe, bul baǵytta naqty nátıje joq. Taǵy da eskertemin. Óńir basshylarynyń jumysyn baǵalaǵan kezde osy kórsetkishke basa mán beremiz. Jumys oryndaryn ashý jurttyń áleýmettik jaǵdaıyna tikeleı áser etedi. Ekonomıkanyń turaqty damýy da osyǵan baılanysty. Sondyqtan Úkimet ákimdermen birlesip, bul mindettiń qalaı oryndalyp jatqanyn taldaýǵa tıis», – dep eskertti Memleket basshysy.