Bul týraly Indýstrıa jáne ınfraqurylymdyq damý mınıstri Qaıyrbek Óskenbaev aıtty.
Sonymen qatar bıyl Almaty qalasynyń áýejaıynda jańa jolaýshylar termınalynyń qurylysy bastaldy, dep habarlaıdy Almaty-akshamy.kz
«Bıyl 1 tamyzdaǵy jaǵdaı boıynsha, «Qýatty óńirler – el damýynyń draıveri» ulttyq jobasyn iske asyrýǵa 650,1 mlrd teńge bólindi, onyń ishinde respýblıkalyq búdjet 440,4 mlrd teńgeni, búdjetten tys qarajat 155,8 mlrd tengeni jáne jergilikti búdjet 53,9 mlrd tengeni quraıdy. Jospar kestesine sáıkes barlyq búdjet tolyq kólemde ıgerildi», - dedi Q. Óskenbaev.
Mınıstrdiń aıtýynsha, ınfraqurylymdy keshendi damytý mindeti boıynsha 79,3 mlrd teńge tolyq ıgerildi nemese 99%-dy paıyzdy qurady. «İshki kólik jelisin damytý» mindetinde 301,2 mlrd teńge ıgerilgen. Olar respýblıkalyq mańyzy bar avtomobıl joldaryn salýǵa, rekonstrýksıalaýǵa jáne jóndeýge, jergilikti mańyzy bar avtomobıl joldaryn salýǵa, rekonstrýksıalaýǵa jáne jóndeýge baǵyttalǵan.
«Qalypty jaǵdaıdaǵy jol sapasynyń kórsetkishi jyl sońyna deıin respýblıkalyq jeli boıynsha 91%-ǵa deıin, al jergilikti jeli boıynsha 85%-ǵa deıin jetedi. Shymkent jáne Qostanaı qalalaryndaǵy áýejaılardyń jerústi ınfraqurylymy jańǵyrtylady. Sondaı-aq bıyl Almaty qalasynyń áýejaıynda jańa jolaýshylar termınalynyń qurylysy bastaldy», - dep túsindirdi Q. Óskenbaev.