Almaty qalasynyń QAJ departamentine qarasty №11 mekemede kámeletke tolmaǵan sottalǵandar 1 maýsym — Balalardy qorǵaý kúnin asyǵa kútedi. Sebebi dál osy kúni túzeý mekemesindegi jasóspirimder ata-anasymen, týǵan-týysymen kezdesedi.
Bıyl da jyldaǵy dástúr boıynsha mekeme qyzmetkerleri balalar merekesinde “Ashyq esik” kúnin uıymdastyrdy. Qylmys jasaǵan balalar jazasyn óteıtin kolonıada qazirgi kúni 70 bala bar. Sonyń ishinde asa aýyr qylmys jasaǵandary – 31, aýyr qylmys jasaǵandary – 39.
Ata-ana men balanyń qaýyshý merekesin QAJ departamenti bastyǵynyń orynbasary ádilet polkovnıgi Azamat Amanjolov izgi tilegimen ashty. Sonymen qatar Almaty qalasy boıynsha QAJ departamentiniń ardagerler keńesiniń tóraǵasy Erǵalı Saǵalbaev jáne QR Adam quqyqtary jónindegi ýákildiń Almaty qalasy boıynsha ókili Qazbek Maldybaev sóz sóıledi.
Ánshi Ahan Erkebulan balalar aldynda óner kórsetti. Qarasaı aýdanynyń “Darıǵa-aı, dáýren” ardagerler uıymynyń ájeler ansambli konserttik baǵdarlama usyndy.
Balalar merekesinde Almatydaǵy “Qystaýbaı Manas”, “Ásker ata” jáne “Ábý Bákir” meshitteri ókilderiniń qoldaýmen jazaly jasópirimder úshin merekelik dastarqan jaıylyp, táttiler de molynan usynyldy.
Kásipker Sman Bekarys balalarǵa sportqa arnalǵan aıaqkıimder syılady. Al Almaty qalasy boıynsha QAJ departamenti ardagerler keńesi jasóspirimder ıgiligi úshin kir jýatyn mashına jáne shash alatyn qurylǵylar tartý etti.
Merekeniń eń kóńildi sáti, árıne, túzeý mekemesinde tárbıelenip jatqan balalardyń ata-ana, týystarymen qushaq jaıa qaýyshýy boldy.