Almaty kitaphanalarynda túrik, aǵylshyn, nemis, fransýz jáne qytaı tilderin tegin oqyp úırenýge bolady, dep habarlaıdy almaty-akshamy.kz
Mundaı erekshe múmkindikke kitap áleminiń áýesqoılary - balalar da, eresekter de ıe. Til úırenýge nıet bildirgenderge sabaqty ýnıversıtet oqytýshylary, elshilik ókilderi men eriktiler júrgizedi. Mádenıet basqarmasy qala kitaphanalary kitap oqýǵa degen qyzyǵýshylyqty oıatý jáne kelýshilerdiń tanymdyq is-áreketin yntalandyrý úshin belsendi jumys istep jatqanyn atap ótti.
«Biz qoǵamnyń jan-jaqty damýyna jáne mádenıetaralyq túsinistikti nyǵaıtýǵa yqpal etetin shyǵarmashylyq bastamalardy belsendi qoldaımyz. Mamandar oqyrmandar úshin ádebı vıktorınalar, avtorlarmen kezdesýler, túrli taqyryptyq baıqaýlar ótkizip qana qoımaı, kitap jáne til úıirmelerin uıymdastyryp júr. Aıta keterligi, 4000-ǵa jýyq adam shetel tili kýrstarynan ótken, bul negizinen 5 jastan 17 jasqa deıingi balalr. Osylaısha, biz óskeleń urpaqtyń kitap oqýǵa degen qyzyǵýshylyǵyn arttyrýǵa baılanysty Memleket basshysy mindettegen tapsyrmany oryndap jatyrmyz. Jalpy kitaphanalarda sıfrlandyrý, kitap qoryn jańartý boıynsha jumystar júrgizilýde jáne bul máseleler qala ákiminiń erekshe baqylaýynda», – dedi Almaty qalasy mádenıet basqarmasynyń basshysy Ǵanı Maılybaev.
Qazir mektep jasyna deıingi balalar da ata-analarymen birge «Onay English», «English for children», «Mama&me» jáne «Read-ka» jobalaryna qatysýda. Aıta keterligi, Almaty kitaphanalary qazaq tilin úırenemin jáne jetildiremin deıtin oqyrmandar úshin de qolaıly jaǵdaı jasaǵan: qazaq tilinde kórkem jazý, durys sóıleý jáne sheshendik ónerge baýlýǵa baǵyttalǵan jobalar júzege asýda.
Kitaphanalar jelisi usynǵan jańalyqtardan shet qalmaý jáne til kýrstaryna qatysty qosymsha aqparat alý úshin qala kitaphanalarynyń Instagram-daǵy resmı paraqshasyna @library.almaty jazylýǵa shaqyramyz.
Anyqtama úshin: Almatyda 28 qalalyq kitaphana jumys isteıdi. Olar – Jambyl atyndaǵy qalalyq jasóspirimder kitaphanasy, ALATAU CREATIVE HUB, A.P. Chehov atyndaǵy Ortalyq qalalyq kitaphana, Otbasylyq oqý kitaphanasy, Almaly kitaphanasy, I.A. Krylov atyndaǵy qalalyq balalar kitaphanasy, S.Begalın atyndaǵy Ortalyq qalalyq balalar kitaphanasy, №45 fılıal, №44 fılıal, №39 balalar kitaphana bólimshesi, №33 balalar kitaphana bólimshesi, № 32 kópshilik kitaphana, №31 kópshilik kitaphana, №30 balalar kitaphanasy, №29 balalar kitaphana bólimshesi, №26 kitaphana bólimshesi, №24 balalar kitaphana bólimshesi, № 20 kitaphana bólimshesi, №15 kitaphana bólimshesi, №14 kitaphana bólimshesi, №6 kitaphana bólimshesi, №4 kitaphana bólimshesi, Qazaqstan Jazýshylar kitaphanasy, №1 balalar kitaphana bólimshesi. Tizimdegi alǵashqy eki kitaphana táýlik boıy jumys isteıdi.