Dári-dármek Úndistannan ákelingen.
Almatydaǵy "Jetisý" keden beketinde kedendik tekserý barysynda Úndistannan zańsyz ákelingen dári-dármek partıasynyń joly kesildi, dep habarlaıdy Almaty-akshamy.kz qalalyq memlekettik kirister departamentiniń baspasóz qyzmetine silteme jasap.
"Taǵamǵa bıologıalyq belsendi qospa" degen atpen taza salmaǵy 356 keli bolatyn 54 449 dana daıyn dárilik zattardyń partıasyn (tabletka túrinde) elge kirgizýge tyrysqan", - delingen baspasóz qyzmeti taratqan aqparatta.
Kedendik saraptama nátıjesinde taýar "dárilik zat" ekeni jáne terapevtik maqsattarda paıdalanýǵa arnalǵany anyqtaldy. Ol dozalanǵan dárilik formada bólshek saýdaǵa arnalyp oralǵan.
"Júrgizilgen esepteýlerge sáıkes, taýardyń kedendik quny 43,4 mıllıon teńgeni, al búdjetke keltirilgen shyǵyn somasy 5,2 mıllıon teńgeni qurady. Syrtqy ekonomıkalyq qyzmetke qatysýshynyń is-áreketinen Qylmystyq kodekstiń 234-babynda kózdelgen "ekonomıkalyq kontrabanda" zańbuzýshylyq belgileri baıqalady. Osyǵan baılanysty materıal sheshim qabyldaý úshin Almaty qalasy boıynsha ekonomıkalyq tergeý departamentine jiberildi", - delingen habarlamada.
Jalpy, jyl basynan beri departament kedendik tekserý nátıjeleri boıynsha keden zańnamasyn buzýdyń 780 faktisin anyqtaǵan. Aıyppul somasy 6,4 mıllıon teńgeni qurady, qosymsha 82,2 mıllıon teńgege kedendik tólemder men salyqtar eseptelip, óndirildi.
MKD "Qazaqstan Respýblıkasyndaǵy kedendik retteý týraly" Kodekstiń 34-baby 1-tarmaǵyna sáıkes, Eýrazıalyq ekonomıkalyq odaqtyń kedendik aýmaǵyna ákelinetin taýarlar odaqtyń kedendik shekarasynan ótken kezden bastap kedendik baqylaýda bolatynyn eske salady.