Qorǵalǵan múliktik quqyqtardyń somasy 10 mlrd teńgeden asty.
Bul týraly Almaty qalasy Kásipkerler palatasynyń dırektory Aıtýar Qoshmambetov málimdedi. Ol Óńirlik komýnıkasıalar qyzmeti alańynda sóz sóılep, 2021 jyldyń qorytyndysyn shyǵardy, dep habarlaıdy Almaty-akshamy.kz
Aıtýar Qoshmambetovtyń aıtýynsha, bıyl 546 ótinish kelip túsken, onyń ishinde 236-sy boıynsha konsýltatıvtik-quqyqtyq kómek, 310-y boıynsha problemalyq máselelerdi sheshýge kómek kórsetilgen. Qorǵalǵan múliktik quqyqtardyń somasy 10 mlrd teńgeden asty.
Ádette ótinishterdiń basym bóligi salyq salý máseleleri boıynsha túsedi, sondaı-aq memlekettik organdarǵa shaǵymdar, Ashyq jobasy boıynsha obektilerdi ashý máseleleri boldy.
Eń ótkir máseleler Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńestiń 10 otyrysynda qaraldy. Sonymen qatar, aıtylǵan máseleler rastaldy, al memlekettik organdar keńes usynystarymen kelisti. Júrgizilgen tekserýler nátıjesinde memlekettik organdardyń 7 laýazymdy tulǵasy tártiptik jaýapkershilikke tartyldy, jergilikti polısıa qyzmetiniń eki qyzmetkeri laýazymdyq ókilettikterin asyra paıdalanǵany úshin jumystan shyǵaryldy.
«Bizdiń sarapshylar 83 azamattyq jáne ákimshilik ister boıynsha túrli sot ınstansıalaryna qatysyp, kásipkerlerdiń quqyqtaryn qorǵady. Bıznes múddelerin qorǵaýdyń taǵy bir mysaly respýblıkalyq jáne aımaqtyq normatıvtik-quqyqtyq aktilerge saraptama júrgizý bolyp tabylady», - dedi Almaty Kásipkerler palatasynyń dırektory.
Palata qyzmeti baǵyttarynyń biri ákimshilik kedergilerdi joıý bolyp tabylady. Máselen, palata osyndaı 31 faktini anyqtady.
«Eger jaǵymdy keıster týraly aıtatyn bolsaq, palatanyń Almaty qalasy boıynsha MKD-ǵa júginýiniń arqasynda QR QM Memlekettik kirister komıtetiniń aqparattyq júıeleri arasynda habarlamalarmen almasýdyń tehnıkalyq problemasy joıyldy. Osy máselege baılanysty kásipkerler qaryzynyń joqtyǵy týraly anyqtama ala almady», - dep atap ótti A. Qoshmambetov.
Sondaı-aq, quqyqtyq blok sarapshylary turaqty emes jolaýshylar tasymaly (týrısik jáne balalar avtobýstary) salasynda jumys isteıtin 25 kásipkerge kómek kórsetti. Palata olarǵa avtobýs jolaǵynda júrýge ruqsat alýǵa kómektesti.
Budan basqa, Almaty seriktestigine kómek kórsetildi, oǵan aýmaqty jáne jazǵy alańdy abattandyrý úshin nysanaly maqsaty bar jer ýchaskesin jalǵa alýdy uzartýǵa 4 ret ruqsat berilmedi. Kásipker Joǵarǵy Sotta sot daýlarynan aıyryldy, biraq Palata aralasqannan keıin másele bıznes sýbektisiniń paıdasyna sheshildi.