«Damý» qory biryńǵaı sharttarmen jáne kepildiktermen bıznesti qoldaýdyń jańa sharalaryn usyndy
Almaty qalasynyń óńirlik komýnıkasıalar qyzmetiniń alańynda ótken baspasóz konferensıasy barysynda «Damý» qory fılıalynyń dırektory Jandos Nurǵazınov memlekettik qoldaýdyń jańa sharalaryn tanystyrdy, dep habarlaıdy aqshamnews.kz.
Bul sharalar qarjylandyrýdyń qoljetimdiligin keńeıtýge jáne shaǵyn bıznesten bastap iri kompanıalarǵa deıingi bıznestiń barlyq sanattary úshin jaǵdaılardy jeńildetýge baǵyttalǵan.
2024 jyldan bastap qor naryǵy men áleýmettik kásipkerlikti damytý úshin mıkrobıznesti, SHOB pen iri bıznesti qamtıtyn biryńǵaı keshendi baǵdarlama jumys isteıdi. Ár baǵyttyń basym salalary, kredıtter boıynsha lımıtteri jáne 7% - dan 10% - ǵa deıingi saralanǵan paıyzdyq mólsherlemeleri bolady.
«Qazirgi ýaqytta memlekettik qoldaý sharalaryn keńeıtý josparlanýda, onyń ishinde túpkilikti qaryz alýshy úshin 12,6% deńgeıinde biryńǵaı tıimdi mólsherleme belgileý kózdelip otyr. Bul shara bızneske serpin berýge, naqty sektor kásiporyndaryna qarjylandyrý naryǵyn burmalamaı, ádil mólsherleme usynýǵa, sondaı-aq búdjetke túsetin júktemeni azaıtyp, sýbsıdıalaý tájirıbesinen birtindep bas tartýǵa baǵyttalǵan», – dedi J. Nurǵazınov.
Buǵan qosa, Memleket basshysynyń tapsyrmasy aıasynda Úkimetpen, ekinshi deńgeıli banktermen jáne basqa da ınvestorlarmen birlesip, SHOB pen iri bıznes jobalaryn nesıeleý úshin kepildik berý qorlary iske qosyldy.
Kepildik berý qorlary shaǵyn jáne orta bızneske (SHOB) kelesi sharttarmen qoldaý kórsetedi:
nesıe somasy 7 mlrd teńgege deıin;
kepildik mólsheri nesıe somasynyń 85%-yna deıin, biraq 3,5 mlrd teńgeden aspaıdy;
kepildik merzimi - qarjylandyrý merzimimen shekteledi;
kepildik quny - jyldyq 1,5%.
İri bıznes jobalary úshin usynylatyn sharttar:
nesıe somasy 7 mlrd teńgeden joǵary;
bastamashynyń qatysýy - joba qunynyń keminde 20%-y;
kepildik mólsheri 30%-ǵa deıin;
kepildik merzimi 15 jylǵa deıin;
kepildik quny - jyldyq 2%.
«Kepildik qaıtarymsyzdyq pen shartsyzdyq qaǵıdattary boıynsha usynylatyn bolady, bul qarjy uıymdary úshin quraldy tartymdy etedi», – dep atap ótti spıker.
Búgingi tańda «Damý» qoryna barlyq ótinimder onlaın-rejımde qabyldanady. 2019 jyly Online-Damu jeke sıfrlyq platformasy iske qosyldy, sonyń arqasynda ishki prosesterdi avtomattandyrýǵa jáne jedeldikti edáýir arttyrýǵa múmkindik týdy. Nátıjesinde ótinimderdi qaraý merzimi 21-den 5 jumys kúnine deıin qysqardy.
«Damý» qory Qazaqstannyń kásipkerlik ekojúıesin damytýda mańyzdy ról atqarady. Onyń mindeti – qarjylyq jáne qarjylyq emes qoldaý quraldaryn usyný ǵana emes, sonymen qatar bıznesti barlyq kezeńderde – mıkrodan bastap iri kompanıalarǵa deıin keshendi súıemeldeý. Mundaı qoldaý jumys oryndaryn qurýǵa, qolaıly bıznes-ortany damytýǵa jáne el ekonomıkasyn ártaraptandyrýǵa yqpal etedi», – dep atap ótti J. Nurǵazınov.