Almatynyń óńírlík kommunıkatsıyalar qyzmetínde ótken baspasóz konferentsıyasynda «Damu» kásípkerlíktí damytu Qory fılıalynyń dırektory Jandos Nūrǵazınov jūmys qorytyndylary men megapolıs kásípkerlerí úshín jańa qoldau sharalary jaıynda aıtyp óttí, dep habarlaıdy aqshamnews.kz.
Onyń aıtuynsha, qyzmet bastalǵannan berí qor jalpy somasy 2,2 trln teńgege 20,4 myńnan astam jobaǵa qoldau kórsettí, onyń 85% - y mıkro jáne shaǵyn bızneske tıesílí.
«Qor qoldaǵan kásíporyndar búkíl kezeń íshínde 16 619,9 mlrd teńgege óním óndíríp, al tólengen salyq kólemí 1 242,5 mlrd teńgení qūrady. 140 myńnan astam jūmys orny saqtalyp, jańadan ashyldy. Osylaısha, salynǵan árbír 1 teńge 5 teńge mólsherínde salyq retínde qaıtarylady», – dep atap óttí J. Nūrǵazınov.
Qala ákímdígímen bírlesíp íske asyrylatyn «Almaty Business/Jana Business» baǵdarlamasyna erekshe nazar audaryldy. Baǵdarlama ayasynda ShOB ókílderíne jyldyq 7% mólsherlememen, 7 jylǵa deıíngí merzímge jáne 100 mln teńgege deıíngí somaǵa nesıe beru ūsynylady. 2015 jyldan bastap baǵdarlamaǵa 32,5 mlrd teńge baǵyttaldy, al aǵymdaǵy jyly taǵy 3 mlrd teńge bólu josparlanuda.
Baǵdarlama ayasynda 852 kásípkerge qoldau kórsetílíp, jalpy somasy 124,9 mlrd teńgege nesıe beríldí. Sonyń nátıjesínde 1 214 mlrd teńgeníń ónímí óndírílíp, byudjetke 100,7 mlrd teńge salyq tústí.
Nūrǵazınov kásípkerlermen «Damu» qorynan qoldau alu turaly keńesterímen bólístí.
«Qor shaǵyn jáne orta kásípkerlík subektílerín qoldauǵa baǵyttalǵan bírqatar qūraldardy ūsynady. Olardyń qatarynda basym baǵyttar boıynsha 200 mln teńgege deıíngí nesıelerge paıyzdyq mólsherlemení subsıdıyalau, kepíldík beru, jeńíldetílgen nesıeleu jáne jobalardyń tıímdílígín baqylau bar. Qoldau alu úshín kásípker bankke ótíním tapsyryp, maqūldaudan ótíp, qajettí qūjattardy «Damu» qoryna ūsynady. Keıín bankpen jáne qor ókílderímen úshjaqty kelísímshartqa qol qoıylady», – dep túıíndedí ol.