Almaty qalasynyń ákimi Erbolat Dosaev aldaǵy qysqy jylytý maýsymyna daıyndyq boıynsha shtabtyń kezekti keńesin ótkizdi.
Qala basshysyna energetıka jáne sýmen jabdyqtaý basqarmasynyń, «Almaty jylý jelileri» JSHS, «Almatyjylýkommýnenergo» JSHS, «Almaty Sý» MKK, «Almaty elektr stansıalary» AQ, «Alataý Jaryq kompanıasy» AQ «QazTransGazaımaq» AQ jáne t. b. basshylary jóndeý jáne daıyndyq jumystarynyń aralyq qorytyndylary týraly baıandady, dep habarlaıdy Almaty-akshamy.kz.
Keńes barysynda beıindi vedomstvolar atap ótkendeı, Almatynyń jylý energetıkalyq kesheni men ınjenerlik jelileriniń qys mezgiline jalpy daıyndyǵy búginde 95%-dy quraıdy. Barlyq jumystar keste boıynsha júrýde.
Josparǵa sáıkes, Almatydaǵy qala sharýashylyǵynyń aldaǵy kúzgi-qysqy kezeńge tolyq daıyndyǵy aǵymdaǵy jyldyń 1 qazanyna deıin qamtamasyz etiledi.
Osy jyldyń jylýaralyq kezeńinde Almatyda 17,7 km jylýmen jabdyqtaý, 120 km elektrmen jabdyqtaý, 43 km sýmen jabdyqtaý, 29 km gazben jabdyqtaý jelileri qaıta jańartylyp, jóndelýde.
Daıyndyq jumystary «Almaty elektr stansıalary» AQ obektilerinde de júrgizilýde (JEO-1, JEO-2, Kaskad GES, Batys jylý kesheni): jylytý maýsymynyń úzdiksiz ótýi úshin energetıkalyq generasıalaıtyn jabdyqqa (56 birlik) jóndeý júrgizilýde.
Almaty qalasy energetıka jáne sýmen jabdyqtaý basqarmasynyń basshysy Talǵat Malybaevtyń aqparaty boıynsha, «qaladaǵy jylý energetıkalyq keshenniń jylytý kezeńine daıyndyǵy aıaqtalyp qaldy. Bul rette jylý jelileriniń daıyndyǵy 91%-dy, sýmen jabdyqtaý – 100%-dy, elektr jelileriniń daıyndyǵy-99%-dy quraıdy».
Qysqy kezeńge daıyndyq máselesi Almaty ákiminiń jeke baqylaýynda. Buǵan deıin Erbolat Dosaev energetıka jáne sýmen jabdyqtaý basqarmasyna (ESJB) Ońtústik aýdandyq qazandyqqa erekshe nazar aýdara otyryp, jylýmen jabdyqtaý obektilerindegi daıyndyq jumystarynyń barysyn baqylaýdy tapsyrǵan bolatyn. ESJB derekterine sáıkes, atalǵan obektide aýmaqty abattandyrý, gaz qubyrlaryn, tútin murjalaryn oqshaýlaý, mazýtty saqtaý rezervýarlaryna qorshaý jumystary júrgizilýde. Búgingi tańda nysannyń daıyndyǵy 93%-dy quraıdy. Rekonstrýksıa aıaqtalǵannan keıin qazandyq 200 myńnan astam tutynýshyny jylýmen qamtamasyz etedi, onyń ishinde Bostandyq aýdanyndaǵy salynyp jatqan turǵyn úı keshenderi.
Almatynyń turǵyn úı qorynyń daıyndyǵy bekitilgen kestege sáıkes, búgingi tańda 96% -dy, bilim berý nysandarynyń – 98%-dy, densaýlyq saqtaý nysandarynyń-98% - dy quraıdy.
«Jylytý maýsymyna tolyq daıyndyqty qamtamasyz etý – qala úshin mańyzdy mindetterdiń biri. Qalǵan jumystardy 1 qazanǵa deıin aıaqtaý kerek. Gagarın kóshesi jol júrý úshin ashyldy. Qala turǵyndarynyń júrip-turýyna yńǵaıly bolý úshin Qajymuqan kóshesindegi qurylys – montaj jumystaryn tez arada bitirgen jón», - dedi Erbolat Dosaev jáne energetıka, bilim,densaýlyq saqtaý basqarmalaryna, sondaı-aq aýdan ákimdikterine osy máselelerdi jiti baqylaýdy tapsyrdy.