5 qazanda Qurmanǵazy atyndaǵy Qazaq ulttyq orkestri 90-shy konserttik maýsymyn ashady.
Orkestr tyńdaýshylary men mýzyka áýesqoılaryn qandaı mýzykalyq jańalyqtar kútip turǵanyn orkestr ujymy ÓKQ brıfıńinde aıtty, dep habarlaıdy Almaty-akshamy.kz.
90-shy mereıtoılyq maýsym óte qarqyndy bolýǵa ýáde beredi. Aǵymdaǵy konserttik maýsym Italıadaǵy gastróldik týr barysynda ashyldy. Orkestrdiń konserttik týrlary Respýblıka qalalary boıynsha da jalǵasýda, dep eske aldy Qurmanǵazy atyndaǵy Qazaq ulttyq halyq aspaptar orkestriniń dırektory Medet Qýanyshev.
«5 qazanda 90-shy maýsymnyń ashylýy bastalady. Kelesi jyly orkestr qurylǵanyna 90 jyl tolady, ony bárimiz asyǵa kútip júrmiz. Mereıtoıǵa baılanysty respýblıkanyń barlyq qalalarynda jáne odan tys jerlerde gastróldik týrlar josparlanýda. Ataýly kúnniń qurmetine bizdiń tyńdaýshylarymyzdyń aldynda Qazaqstan Respýblıkasynyń Halyq ártisi Nurjamal Úsenbaeva men Qazaqstan Respýblıkasynyń eńbek sińirgen ártisi Nurlan Ónerbaev óner kórsetedi. Bizdiń orkestr ujymymen qatar Abaı atyndaǵy qazaq memlekettik akademıalyq opera jáne balet teatrynyń jáne fılarmonıa ártisteri de óner kórsetedi», - dep bólisti M. Qýanyshev.
Jańa maýsymda tyńdaýshylardy jańa mýzykalyq shyǵarmalar kútedi. Orkestr otandyq jáne sheteldik kompozıtorlardyń úzdik shyǵarmalaryn oryndaıdy.
«Biz kórermenge jańa repertýar usynýǵa tyrysamyz. Bul sheteldik jáne otandyq kompozıtorlardyń shyǵarmalary bolmaq. Osy maýsymda biz kompozıtor Zekıná de Abreýdiń áıgili «Tıko-Tıko» shyǵarmasyn oryndamaqpyz. Shostakovıchtiń 10-shy sımfonıasynyń ekinshi bólimi de birinshi ret oryndalady. Al qalǵany tyńdaýshylarymyz úshin tosyn syı bolsyn», - dedi ulttyq orkestrdiń bas dırıjeri Abylaı Tilepbergen.
Óz kezeginde, qobyz tobynyń konsertmeısteri, halyqaralyq baıqaýlardyń laýreaty Ásel Rahymjan emosıalaryn jasyrmady, basty oqıǵa - ulttyq orkestrdiń 90 jyldyq mereıtoıy aldynda qatty tolqyp júrgenin aıtty.
«Biz 90 jyldyqty asyǵa kútemiz, óıtkeni úlken oqıǵanyń bir bóligi bolý biz úshin úlken mártebe. Bizdiń orkestrde Ahmet Jubanov, Shamgon Qajyǵalıev,Qarshyǵa Ahmedıarov, Fatıma Balǵaeva jáne basqa da kóptegen uly mýzykanttar jumys istedi», - dep bólisti A.Rahymjan.