«Alma bala» aksıasy aıasynda sábılerge syılyq berildi.
Almatylyq jastar ana atanyp, perzenthanadan shyqqan 100 názikjandyny quttyqtady. Igi is-sharany «Jas Otan» jastar qanaty, «Jastar resýrstyq ortalyǵy» jáne Volonterlar lıgasy arnaıy uıymdastyrdy, dep habarlaıdy Almaty-akshamy.kz Almaty.tv-ge silteme jasap.
Qala kúni qarsańynda ótken aksıaǵa jastar arnaıy «Alma bala» degen ataý beripti. Aksıa aıasynda qalamyzdyń belsendi jastary 6 perzenthanaǵa baryp, úıge shyǵarylyp jatqan analarǵa alma jáne sábıdiń kútimine kerek zattar salynǵan sebetter taratty. Osylaısha Almatynyń kishkentaı turǵyndaryn merekesimen quttyqtaǵymyz keldi deıdi olar.
«Qalamyzdaǵy búkil perzenthananyń aldynda Almaty jastary osy aksıany uıymdastyryp jatyr. Búgin biz shamamen 100 sábıdi dúnıege kelýimen, osyndaı tamasha qýanyshty sátimen quttyqtaǵan bolatynbyz», - dedi Qalalyq Jas Otan jastar qanatynyń tóraǵasy Nursultan Bekqaıyrov.
Analar olarǵa kórsetilgen qamqorlyq pen ystyq yqylasty qýana qabyl aldy.
«Men keshe saǵat tańǵy 7:10 ketkende qyz bosandym. Perzenthanaǵa eki kún buryn túsken bolatynmyn. Osylaı bizdi quttyqtap kelip jatqan Almatynyń jastaryna rahmet!» - dedi qala turǵyny Nurdıana Qojasova.
«Keshe ul bosandym. Dúnıege keldi aman esen. Densaýlyǵymyz jaqsy, shúkir. Qala kúnimen quttyqtaımyn. Barlyqtaryńyzǵa, medbıkelerge, eriktilerge rahmet!» - dedi qala turǵyny Saıda Júnisqyzy.
Merekelik aksıa qalalyq perınataldyq ortalyǵynda da jalǵasty. Munda jylyna 8 jarym myńdaı sábı dúnıe esigin ashady eken. Sońǵy bir táýliktiń ózinde 30-ǵa jýyq náreste aman-esen týylǵan.
«Biz Almaty qalasynda qaýip-qater tobyndaǵy áıelderdi qabyldaǵandyqtan, bizde bosanatyn da, júkti de , bosanyp jatqan áıelderdiń de sany kóp. Óıtkeni, Almaty qalasynyń árbir 5-nárestesi bizdiń perzenthanada dúnıege keledi», - dedi Qalalyq Perınataldyq ortalyǵynyń bólim meńgerýshisi Roza Qaıranbaeva.
Jastardyń quttyqtaýy bul aksıamen ǵana toqtap qalmaıdy. Aldaǵy kúnderi belsendiler qalamyzdyń basty kóshelerinde avtosherý uıymdastyryp, merekelik kóńil kúı syılaıtyn bolady.