2024 jyl Almaty úshin jarqyn jetistikterge toly boldy. Qala turǵyndarynyń ómir sapasyn arttyrýǵa baǵyttalǵan kóptegen mańyzdy jobalar júzege asty. Bilim berý, kólik ınfraqurylymy, sıfrlandyrý jáne áleýmettik salalarda tyń ózgerister oryn alyp, órkenıetti megapolıske aınalý jolynda mańyzdy qadamdar jasaldy. Osy rette qala turǵyndary bul jetistikterdi joǵary baǵalap, Almatynyń damýyna oń kózqarasyn bildirdi.
Zaǵıpa QARASARTOVA, zeınetker: ALMATY — ÓRKENIET KÓSHİNDE
– Bizdiń Naýryzbaı aýdany burynǵydan keńeıip, úlkeıip keledi. Bala sany kóp. Baıqaýymsha, bizdiń aýdanǵa mektep avtobýsy kóp bólingen. Balany mektepke aparyp, alyp qaıtatyn avtobýstardy shetel kınolarynan kórýshi edik qoı, sol órkenıet bizge de jetti. Oqýshylardyń túskenin, qaıtarda mingenin qadaǵalap otyratyn muǵalimder de bólingen eken. Qala ákimdiginiń balalar qaýipsizdigine úlker mán beretini kóńilge qonady. Bul ata-analardyń da kúndiz alańdamaı jumys isteýine múmkindik.
Baqyt QANAI, júrgizýshi: QAÝİPSİZDİK MAŃYZDY
– Almatyda “Sergek” beınekameralarynyń kóbeıgeni durys boldy. Kóligin jyldamdyqty asyryp júrgizetinder úshin tejeý bolǵan sıaqty bul qadam. Keıbir tanystarym “attap bassań, kamera!” dep renjip jatady. “Tártipke baǵynǵan qul bolmaıdy” demekshi, bul eń aldymen ózińizdiń de, ózgeniń de qaýipsizdigi úshin jasalǵan oń sheshim ekenin aıtyp júremin.
Almas QULANBAI, qala turǵyny:
JAŃA AVTOBÝSTARǴA RIZAMYN
– 2024 jyly Almatyda qoǵamdyq kólikti jańartý jumystary qarqyndy júrdi. Jańa elektr avtobýstarynyń paıda bolǵanyna qýanyshtymyn. Bul kólikter tek ekologıalyq taza ǵana emes, sondaı-aq óte yńǵaıly. Jańa avtobýstarda oryn jetkilikti, kondısıoner bar ári júrý jyldamdyǵy jaqsy. Qala bıligine osyndaı bastamasy úshin alǵysymdy bildiremin. Qoǵamdyq kólikti jaqsartý jol qozǵalysyn jeńildetip, ekologıany saqtaýǵa óz úlesin qosady.
Maıra JANATQYZY, ata-ana: MEKTEPKE JAQYN BOLDYQ
– Bıyl bizdiń aýdanymyzda jańa mektep ashyldy. Bul biz úshin úlken kómek boldy. Buryn balalarymdy shalǵaıdaǵy mektepke tasýǵa májbúr bolsam, endi jaqyn jerde oqıdy. Mektep zamanaýı quraldarmen jabdyqtalǵan, muǵalimderi tájirıbeli. Balalarymnyń bilim sapasy jaqsaryp, mektepke barar jolda ýaqyt únemdeımiz. Osyndaı ıgi isterdiń júzege asýyna kómektesken qala basshylyǵyna alǵys bildiremin.
Nurbaqyt JALǴASULY, IT mamany: SIFRLYQ TEHNOLOGIANY ENGİZÝ MAŃYZDY
– Meni osy jyly Almatydaǵy Smart City jobalarynyń damýy qatty qýantty,bul joba qala ómiriniń kóptegen salalaryn jaqsartty. Mysaly, ıntellektýaldy kameralardyń arqasynda joldaǵy zań buzýshylyqtar birshama azaıyp, kólik qozǵalysy qaýipsiz ári rettelgen sıpatqa ıe boldy desek te bolady. Bundaı sıfrlyq tehnologıalardy engizýdiń taǵy bir artyqshylyǵy – qala qyzmetteriniń ashyqtyǵy men tıimdiligi ákeledi.Smart City aıasynda bıyl ornatylǵan ıntellektýaldy avtoturaq júıeleri óte tıimdi bolyp shyqty. Kóshelerdegi oryn tapshylyǵyn azaıtyp, kólik júrgizýshilerine ýaqyt pen otyndy únemdeýge kómektesýde. Mundaı sheshimder qalanyń ınfraqurylymyn damytyp qana qoımaı, ómir sapasyn arttyrýǵa da yqpal etedi.
Baqytjan QURALBAI, avtomektep ınstrýktory: ALTY JOLAQ ÚSHİN ALǴYS AITAMYN
– Qulja traktisindegi alty jolaqty jańa joldyń ashylǵanyna qýanyshtymyn. Bul joba Almatynyń kólik ınfraqurylymyn damytýdaǵy úlken qadam boldy. Jol qozǵalysy endi aıtarlyqtaı jeńildep, qalanyń shyǵys baǵytyndaǵy baılanysy jaqsardy. Ózińiz bilesiz, Almatyda kólik sany jyl ótken saıyn kóbeıip keledi. Almatyǵa jaqyn eldimekenderdiń birinen kelip jumys isteımin. Joldyń azabyn bir kisideı-aq kórdik. Buryn qalaǵa kirer jolda 10-12 baldyq keptelispen júrý («Iandeks» boıynsha) kúndelikti qubylysqa aınalǵan edi. Tehnıka bolǵan soń keıde kólikter jolda buzylyp qalady. Sondaı kezderde turyp qalmasaq, qazir burynǵydaı keptelis joq. Mundaı mańyzdy jobany júzege asyrǵan ákimdikke, qurylysshylarǵa jáne barlyq jaýapty tulǵalarǵa shyn júrekten alǵys aıtamyz. Bul jol qala turǵyndaryna qaýipsiz ári yńǵaıly qozǵalys syılaıtynyna senimdimin!
Saltanat Daýletova, qala turǵyny: ÓZ AS BÓLMEM BOLADY
– 2014 jyldan úı kezeginde turdym. Bıyl 15 qarashada «Shuǵyla» yqshamaýdanyndaǵy kópqabatty turǵyn úılerdiń birinen páter aldym. Men erekshe balanyń anasymyn. Balamnyń bolashaǵy úshin ýaıymdaýshy edim. Mine, endi meniń óz as bólmem, ózim paıdalanatyn tehnıkalarym bolady. Bólmelerimdi ózimniń qalaýyma saı jabdyqtaımyn. Bul meniń uzaq jyl kútken armanym bolatyn. «Óz úıim – óleń tósegim» demekshi, balamyz ekeýmizdiń birge ýaqyt ótkizip,este qalarlyq estelikter syılaıtyn tamasha kúnder kútip tur dep oılaımyn. Bul meniń bolashaqqa degen qadamym.