QR Ónerkásip jáne qurylys mınıstri Ersaıyn Naǵaspaev búginge deıin jalpy quny 138,2 mlrd teńgeni quraıtyn 41 joba sátti júzege asyrylǵan Almatynyń Indýstrıaldy aımaǵynda boldy. Bul jobalar 4 700-den astam jumys ornyn qamtamasyz etti. Qazirgi ýaqytta jalpy quny 416,9 mlrd teńgeni quraıtyn taǵy 67 ınvestısıalyq joba belsendi satyda, bul 10 200-ge jýyq jańa jumys ornyn qurýǵa múmkindik beredi.
Sapar barysynda Mınıstr irgeli kásiporyndardyń jumysymen tanysty:
Hyundai Trans Auto – jylyna 10 000 júk kóligi men 1 200 avtobýs shyǵarady;
Hyundai Trans Kazakhstan – 15 ga aýmaqta ornalasqan zaýyt, jeńil avtomobılderdiń 8 modelin shyǵarady;
Kazakhstan Mobility Engineering – kompanıa Hyundai avtokólikterine, al 2025 jyldan bastap – Haval, Chery jáne Changan brendterine arnalǵan qazaq tilinde mýltımedıalyq júıelerdi shyǵarady;
Almaty Autoparts Production – qazaqstandyq jáne qytaılyq avtoóndirýshiler úshin avtomobıldik kreslolar shyǵaratyn zaýyt;
Telli Ondiris – tabıǵı turmystyq hımıa jáne kosmetıka shyǵarady, ǵylymı-zertteý jáne tájirıbelik-konstrýktorlyq jumystarǵa arnalǵan zamanaýı zerthanasy bar.
Almaty ındýstrıaldy aımaǵy joǵary tehnologıalyq óndiris oryndaryn qurý jáne jergilikti qamtýdy damytýǵa yqpal etý arqyly óziniń óndiristik áleýetin arttyrýdy jalǵastyrýda. Investısıalardy belsendi tartý ony megapolıstiń jáne tutastaı alǵanda eldiń ekonomıkalyq ósýiniń negizgi draıverleriniń birine aınaldyrady.