Memleket basshysynyń tapsyrmasy aıasynda Aýyl sharýashylyǵy mınıstrligi aýyl sharýashylyǵy daqyldarynyń egis alqaptaryn ártaraptandyrý boıynsha aýqymdy baǵdarlamany iske asyrýdy jalǵastyrýda. Bıyl alǵash ret ártaraptandyrý sharalary shamamen 1 mln gektar aýyl sharýashylyǵy jerin qamtıdy.
Baǵdarlama ishki jáne syrtqy naryqtarda joǵary suranysqa ıe, tabysty daqyldardyń egis kólemin ulǵaıtýǵa baǵyttalǵan. Negizgi maqsat — aýyl sharýashylyǵy sektorynyń bir ǵana daqylǵa, eń aldymen dándi daqyldarǵa táýeldiligin azaıtý jáne turaqty, teńgerimdi aýyl sharýashylyǵy óndirisine kóshý.
2025 jyly burshaq, maıly jáne mal azyqtyq daqyldardyń egis kólemi edáýir artady dep kútilýde. Atap aıtqanda, maıly daqyldardyń egis kólemi 378 myń gektarǵa ósip, 3,3 mln gektardan asady. Kúnbaǵys tuńǵysh ret 1,4 mln gektarǵa deıin egiledi — bul ótken jylmen salystyrǵanda 121 myń gektarǵa artyq. Sonymen qatar, zyǵyr egisi 181 myń gektarǵa, qysha — 52 myń gektarǵa, raps — 28 myń gektarǵa ulǵaıady.
Mal azyqtyq daqyldardyń egis kólemi 127 myń gektarǵa arttyrylyp, mal sharýashylyǵynyń jem-shóp bazasyn nyǵaıtýǵa, egis aınalymyn jaqsartýǵa jáne aýyl sharýashylyǵy óndirisiniń turaqtylyǵyn arttyrýǵa yqpal etedi.
Sońǵy eki jylda bıdaı egis kólemi 750 myń gektarǵa qysqardy, onyń ishinde 2025 jyly — 187 myń gektarǵa. Bul rette naryqtyq jaǵdaı men áleýmettik mańyzdylyǵy eskerilip, arpa egis kólemi 158 myń gektarǵa, qaraqumyq — 41 myń gektarǵa ulǵaıady.
Ótken jylǵy qant qyzylshasynyń ónimdiligine baılanysty bıyl onyń egis kólemi 6,7 myń gektarǵa qysqaryp, 18,4 myń gektardy quraıdy. Sonymen qatar, uıymdasqan sharýashylyqtar ishki naryqty qamtamasyz etý maqsatynda kartop egisin 11,3 myń gektarǵa arttyrady.
Sý resýrstaryn únemdeý maqsatynda maqta egis kólemi 135 myń gektardy quraıdy. Onyń ishinde zamanaýı tamshylatyp sýarý tehnologıalary qoldanylatyn alqap 50 myń gektarǵa deıin ulǵaıtylady, al dástúrli ádispen egiletin kólem 21,4 myń gektarǵa qysqarady.
Jalpy alǵanda, 2025 jylǵy egis alqaptarynyń qurylymy eldiń negizgi ónimderge degen ishki qajettiligin qamtamasyz etýge ǵana emes, sonymen qatar azyq-túlik qaýipsizdigi men agroónerkásiptik keshenniń turaqtylyǵyn nyǵaıtýǵa múmkindik beredi.