Reseı Federasıasy birneshe qazaqstandyq saıasatker men qoǵam qaıratkerine óz aýmaǵyna kirýge resmı túrde tyıym saldy, dep habarlaıdy Aqshamnews.kz
DW-niń málimetinshe, Qazaqstan men Reseı arasyndaǵy qarym-qatynas sońǵy ýaqytta kúrdeli sıpat ala bastaǵan. Buǵan sebep — eki elde de arnaıy «qalaýsyz tulǵalar» tiziminiń bolýy. Qazaqstan tarapy Reseıdiń birneshe medıa jáne saıası tulǵalaryna shekara asýǵa ruqsat bermegen. Atap aıtqanda, bul tizimde Tına Kandelakı, Tıgran Keosaıan, Aleksandr Dýgın, Nıkıta Mendkovıch jáne Reseı Memlekettik Dýmasynyń depýtattary Evgenıı Fedorov, Vácheslav Nıkonov pen Petr Tolstoı bar.
Al Reseı óz kezeginde Qazaqstannan birqatar tanymal tulǵalarǵa tyıym salǵan. Olardyń qatarynda saıasattanýshylar Dosym Satpaev, Dımash Áljanov, qoǵam qaıratkerleri Muhtar Taıjan men Toǵjan Qojaly, sondaı-aq QR Parlamenti Májilisiniń depýtattary Ermurat Bapı men Aıdos Sarym bar.
Májilis depýtaty Aıdos Sarym bul tyıymmen 2021 jyly alǵash ret betpe-bet kelgenin aıtady. Ol kezde qazaqstandyq delegasıa Brússelge saparlap bara jatyp, Máskeý arqyly ótpek bolǵan. Alaıda Máskeýdegi Qazaqstan elshiliginiń sharasyna qatysý úshin qalaǵa shyǵýǵa tyrysqan depýtat shekaradan óte almady.
"Dıplomatıalyq tólqujatym bola tura, meni qalaǵa jibermedi. Basqa delegasıa múshelerin ótkizdi, al men shekara baqylaýynda uzaq ýaqyt otyrdym. Aqyrynda FSB ofıseri kelip, maǵan 'persona non grata' ekenimdi rastaıtyn resmı qaǵaz berdi. Sebebi túsindirilgen joq. Tek eger qaıta zań buzsam, 8 jylǵa deıin bas bostandyǵymnan aıyrylýym múmkin degen eskertý jasaldy", – dedi Sarym DW-ge bergen suhbatynda.
Saıasattanýshylardyń pikirinshe, mundaı tizimder — eki el arasyndaǵy saıası alaýyzdyq pen ıdeologıalyq qaıshylyqtardyń kórinisi. Qazaqstan men Reseı arasyndaǵy odaqtastyq qatynastardyń formaldy sıpatta saqtalǵanymen, qoǵamdyq pikir men ishki saıasatta kelispeýshilikter aıqyn baıqalady. Ásirese, Ýkraınadaǵy soǵys, sóz bostandyǵy, ulttyq saıasat sekildi taqyryptarda kózqaras alshaqtyǵy bar ekeni baıqalady.
Mysaly, tyıym salynǵandardyń qataryndaǵy Muhtar Taıjan men Dosym Satpaev sekildi qoǵam qaıratkerleri Reseıdiń saıasatyna qatysty synı pikirlerimen tanymal. Al Ermurat Bapı men Aıdos Sarym ulttyq múdde men til máselesine qatysty belsendi pikir bildirip júrgen tulǵalar.
Qazaqstan men Reseı arasyndaǵy «persona non grata» daýy — ekijaqty qarym-qatynastaǵy jańa kezeńniń belgisi ispetti. Bul jaǵdaı sóz erkindigi men ustanym erkindigine qatysty kúrdeli máselelerdi alǵa tartýda. Shekaradan kirýge ruqsat bermeý – bul bir eldiń ishki quqyǵy bolsa da, mundaı sheshimder aımaqtyq saıasattaǵy senim men turaqtylyqqa áser etýi múmkin.