Adamdarǵa shuǵyl kómek ýaqtyly kórsetilip jatyr
Búgin saǵat 18:00-de Ekibastuzda № 52 ortalyq jylý pýnktiniń jylý jelilerindegi zaqymdanýdy joıý jáne japqyshty aýystyrý úshin jylý jelileriniń magıstrali ajyratyldy, dep habarlaıdy Almaty-akshamy.kz.
«Ekibastuz qalasyndaǵy apattyq jaǵdaıdy joıý boıynsha jedel shtabtyń málimetinshe, 30 qarashada saǵat 18:00-degi jaǵdaı boıynsha jylý tasymaldaǵyshty jiberý temperatýrasy 93º S (qalypty jaǵdaıda – 84º S), keri qaıtarý – 60º S (qalypty jaǵdaıda -56º S); syrtqy aýa temperatýrasy-19 º S. 17 kóppáterli turǵyn úı, eki áleýmettik nysan jáne bir ákimshilik ǵımarat jylýdan ajyratylsa, 32 kóppáterli turǵyn úı jáne 72 jeke turǵyn úı №52 ortalyq jylý pýnktine (OJP-52) qosylǵan», - dep habarlady jýrnalıserge Pavlodar oblysy ákiminiń baspasóz qyzmeti.
Ekibastuz JEO-da alty qazandyq agregaty (№ 6,8,9,12,14,15) jumys istep tur, taǵy tórt qazandyq agregaty (№ 5,7,11,13) rezervte. Jelilik sýmen jabdyqtaý saǵatyna 1200 tonnadan 750 tonnaǵa deıin tómendedi (qalypty jaǵdaıda – saǵatyna 400 tonna). «30 qarashada saǵat 18:00-de OJP-52 jylý jelilerindegi zaqymdanýdy joıý jáne japqyshtyaýystyrý úshin jylý jelileriniń magıstrali ajyratyldy. 149 kópqabatty úı men 114 jeke úı jylýmen jabdyqtaýdan ajyratyldy», - dep tolyqtyrdy ákimdik. Apattyq-qalpyna keltirý jumystaryna 256 adam jáne 43 tehnıka jumyldyryldy. Jóndeý brıgadalary táýlik boıy jumys uıymdastyryldy.
27 qarashadan bastap Ekibastuzdyń bilim berý nysandary qashyqtan oqytý formatyna aýystyryldy, balabaqshalardyń jumysy toqtatyldy.
Oblystyq ákimdiktiń málimetinshe, adamdarǵa shuǵyl kómek ýaqtyly kórsetilip jatyr.
«Emdeý mekemelerindegi temperatýralyq rejım sanıtarlyq normalarǵa sáıkes 18-24ºS sheginde saqtalady. Ekibastuz qalalyq aýrýhanasynda 255 pasıent (onyń 75-i – bala), onyń ishinde perzenthanada – 65 pasıent (onyń ishinde 28 bala) jatyr. Qala turǵyndary úshin 14 jylytý pýnkti ashyldy», - dep naqtylady baspasóz qyzmeti.