Bul iske ata-analar, bilim berý mekemeleri men qoǵam belsendi atsalysyp jatyr.
Polısıa almatylyqtarǵa balalardyń joldaǵy qaýipsizdigi týraly eskertti, - dep habarlaıdy aqshamnews.kz Polisia.kz-ke cilteme jasap.
Almaty qalasynda balalardyń qatysýymen oryn alǵan jol-kólik oqıǵalary alańdatarlyq jaǵdaıǵa jetti. Ótken jyly qala kóshelerinde 1 511 jol apaty tirkelip, sonyń saldarynan 1 641 bala túrli dárejedegi jaraqat aldy, ókinishke qaraı, tórt bala ajal qushty. Qaıǵyly jaǵdaılardyń aldyn alý úshin Almatyda polısıa jol qaýipsizdigine qatysty aldyn alý sharalaryn kúsheıtýde.
«Balalardyń joldaǵy qaýipsizdigi kóptegen faktorlarǵa baılanysty. Sonyń ishinde qaýipsiz ınfraqurylym mańyzdy ról atqarady. Sondyqtan biz keshendi tásildi ustanamyz. Polısıa bólimsheleri jol-kólik jelisin zerttep, qajetti ózgerister engizýge usynystar beredi. Ótken jyly jol ınfraqurylymyn jaqsartý maqsatynda 300-den astam uıǵarym jiberildi. Bizdiń aýdan boıynsha ótken jyly balalardyń qatysýymen 341 jol-kólik oqıǵasy tirkeldi. Ókinishke qaraı bir bala kóz jumyp, taǵy 370-i jaraqat aldy. Bul – tek bir otbasynyń qaıǵysy emes, búkil qoǵamǵa ortaq aýyrtpalyq. Jol qatelikti keshirmeıdi. Sondyqtan balalaryńyzdyń qaýipsizdigine muqıat bolyńyzdar», – deıdi Alataý aýdandyq polısıa basqarmasy ákimshilik polısıa bóliminiń basshysy Shyńǵys Nurahmetov.
Polısıa ókilderiniń aıtýynsha, "Qaýipsiz jol" respýblıkalyq jedel-aldyn alý sharasy aıasynda tártip saqshylary mektep oqýshylarymen turaqty kezdesýler ótkizip keledi. Sonyń birinde polıseıler №152 jalpy bilim beretin mektepte quqyqtyq tárbıe saǵatyn uıymdastyrdy. Kezdesý barysynda balalarǵa jol qozǵalysy erejeleri túsindirilip, suraq-jaýap ótkizilip, arnaıy ılústrasıalyq býkletter taratyldy. Sondaı-aq "Jas saqshy" synybynyń oqýshylaryna qyzmettik kólik kórsetilip, onyń jumys isteý prınsıpteri tanystyryldy.