Prezıdent Medısınalyq-sanıtarıalyq alǵashqy kómek jónindegi jahandyq konferensıanyń plenarlyq otyrysyna qatysty, dep habarlaıdy almaty-akshamy.kz
Qasym-Jomart Toqaev Medısınalyq-sanıtarıalyq alǵashqy kómek (MSAK) jónindegi Almaty deklarasıasynyń qabyldanǵanyna 45 jyl jáne Astana deklarasıasyna 5 jyl tolýyna oraı uıymdastyrylǵan jahandyq konferensıanyń plenarlyq otyrysyna qatysty.
Memleket basshysy konferensıa qatysýshylaryna iltıpat bildire otyryp, densaýlyq saqtaý jáne medısınalyq-sanıtarıalyq alǵashqy kómek kórsetýdiń halyqaralyq júıesin jetildirý isinde Almaty jáne Astana deklarasıalarynyń mańyzy zor ekenin atap ótti.
– Osydan 45 jyl buryn medısınalyq-sanıtarıalyq alǵashqy kómektiń áleýmettik turǵyda ádiletti modeline negiz bolǵan Almaty deklarasıasy qabyldandy. Bul deklarasıa álemdik densaýlyq saqtaýdyń Uly Hartıasyna aınalyp, kóptegen eldiń halyq densaýlyǵyn jaqsartý úshin shara qabyldaýyna, ony adamnyń irgeli quqyǵy retinde moıyndaýyna túrtki boldy. Almaty deklarasıasy biraz elde ana men bala óliminiń deńgeıin júıeli túrde tómendetý, boljamdy ómir súrý jasyn uzartý úshin sheshýshi ról atqardy. Búginde kóptegen elde ulttyq densaýlyq saqtaý júıesi jolǵa qoıylǵan. Onda medısınalyq-sanıtarıalyq alǵashqy kómekke aıryqsha mán beriledi. Bul bes jyl buryn qol qoıylǵan Astana deklarasıasynda naqtylanady, – dedi Prezıdent.
Qasym-Jomart Toqaevtyń aıtýynsha, MSAK júıesi epıdemıanyń alǵashqy belgilerin anyqtaý jáne tosyn syn-qaterlerge qarsy áreket etý isinde mańyzdy ról atqarady
Memleket basshysy qoǵamdyq densaýlyq saqtaý uıymdary ózderiniń ornyqtylyǵyn jáne týyndaǵan jaǵdaıǵa tez beıimdele alatynyn kórsetkenine nazar aýdardy.
Prezıdent adamzattyń COVID pandemıasyn eńserýine úles qosqany úshin barlyq medısına qyzmetkerine alǵys aıtty.
Qasym-Jomart Toqaevtyń pikirinshe, barlyq yqtımal qaýip-qaterdi eskere otyryp, densaýlyq saqtaý júıesi kez kelgen kúrdeli jaǵdaıǵa árdaıym daıyn bolýy úshin oǵan qoldaý kórsetý kerek. Aýrý-syrqaýdyń belgilerin bastapqy kezeńinde anyqtaý jáne tosyn syn-qaterlerge der kezinde nazar aýdarý úshin áleýetti arttyra berý qajet.