Dáriger koronavırýs pasıentterdiń aýyz qýysynda birqatar qabyný prosesterin týdyrýy múmkin ekenin eskertedi
Almaty qalasy qoǵamdyq densaýlyq basqarmasy basshysynyń orynbasary Laýra Myrzaǵalı vaksınalaý - ınfeksıanyń taralýyn toqtatýdyń jalǵyz joly ekenine senimdi. Al tis dárigeri Gúlnar Sarımova koronavırýs tister men aýyz qýysyna aýyr zaqym keltirýi múmkin ekenin eske saldy, dep habarlaıdy Almaty-akshamy.kz
Ázirge Almatyda barlyq kezeńde birinshi komponentpen 1 052 249 adam, ekinshisimen 984 191 adam egildi. Vaksınalanǵan 60 jastan asqandar jalpy sanynan 122 743 adamdy quraıdy. L. Myrzaǵalı olardyń ishinde 20 myńnan astam adam Pfizer óndirgen preparatpen egilgenin aıtty.
«Tájirıbe kórsetkendeı, vaksınalaý jasóspirimder, bolashaq analar jáne laktasıa kezindegi áıelder úshin qaýipsiz. Búgingi tańda Almatyda Pfizer óndirgen Comirnaty preparatymen 20 329 adam vaksınasıalandy, onyń ishinde 1207 júkti, 4152 bala emizetin ana jáne 14 970 jasóspirim bar», - dep habarlady QDB ókili.
Baspasóz konferensıasyna «Klınıka dobrogo stomatologa» klınıkasynyń bas dárigeri, Qazaqstan stomatologıalyq qaýymdastyǵynyń aımaqtyq dırektory Gúlnar Sálimova qatysyp, koronavırýstyń tis pen aýyz qýysynyń densaýlyǵyna qalaı áser etetinin aıtyp berdi.
G. Sálimova koronavırýs pasıentterdiń aýyz qýysynda birqatar qabyný prosesterin týdyrýy múmkin ekenin eskertti. Ol juqtyrǵan adamdarda dámniń buzylýy, sańyraýqulaqtar, kandıdoz, súıek nekrozy, tistiń túsýi jáne aýzyndaǵy basqa patologıalyq jaǵdaılar paıda bolýy múmkin ekenin atap ótti.
Sonymen qatar, stomatologıalyq problemalar ınfeksıanyń qaýip faktory bola alady, óıtkeni olar deneniń qorǵanys fýnksıalaryn álsiretedi.
«Men barlyq azamattardy vaksınalanýǵa shaqyramyn, óıtkeni ınfeksıa ımýnıtetti aıtarlyqtaı tómendetedi. Stomatologıalyq aýrýlar ımýndyq qorǵanystyń álsireýine baılanysty paıda bolýy múmkin», - dedi tis dárigeri.