Almaty ákimdigi sportshylarǵa qoldaý kórsetti
Almatyda qala ákimdiginiń qoldaýymen el Táýelsizdiginiń 30 jyldyǵy aıasynda jıý-jıtsýdan Almaty jiu-jitsu kids cup halyqaralyq týrnıri ótti. Jarysqa Qyrǵyzstan men Ózbekstan sportshylary keldi. Sondaı-aq týrnır aıasynda Abý-Dabıde ótken álem chempıonatynyń júldegerlerine qurmet kórsetildi, dep habarlaıdy Almaty-akshamy.kz
Abu Dhabi World Jiu-Jitsu Championship týrnırinde Saǵadat Nurmaǵambetov atyndaǵy klýbtyń sportshylary 9 altyn, 5 kúmis jáne 4 qola medal jeńip aldy. Olardyń barlyǵy - 8 jastan 15 jasqa deıingi jas sanatyndaǵylar. Osylaısha Qazaqstan quramasy balalar men jasóspirimder arasyndaǵy chempıonatta jalpykomandalyq birinshi oryndy ıelendi.
Sonymen qatar, 14 jasar Jibek Qalymbetova Abý-Dabıde jıý-jıtsýdan tórtinshi ret álem chempıony atandy. Nuraı Altynbek eki dúrkin álem chempıony, Raıymbek Erjan eki dúrkin álem chempıonatynyń qola júldegeri atandy.
Almaty ákiminiń orynbasary Erjan Babaqumarov Abý-Dabıdegi halyqaralyq jarys jeńimpazdaryna Memleket basshysynyń quttyqtaý hatyn oqyp berdi. El Prezıdenti mundaı jarystardyń óskeleń urpaqty qyzyqtyratynyna jáne salaýatty ómir saltyn nasıhattaýǵa yqpal etetinine senim bildirdi.
«Jasyratyny joq, qazaqstandyqtar jaýyngerlik ónerlerge qyzyǵýshylyq tanytady. Biz sport sheberlerimizdiń jarqyn jeńisterin maqtan tutamyz. Jıý-jıtsý sońǵy jyldary qarqyndy damyp keledi, bizdiń qurama Azıa jáne álem chempıonattarynda tanymal boldy. Bul týrnır de sporttyń osy túrin damytýǵa septigin tıgizedi dep oılaımyn», - delingen Prezıdent Q.-J. Toqaevtyń quttyqtaýynda.
E. Babaqumarov júldeli oryndarǵa ıe bolǵan S. Nurmaǵambetov atyndaǵy klýbtyń tárbıelenýshilerin quttyqtap, olarǵa Almaty ákimi B. Saǵyntaevtyń atynan alǵys hattar tabys etti.
Qala ákiminiń orynbasary jas sportshylardyń myqty rýhyn tárbıelegen Almaty jıý-jıtsý mektebiniń jetistikterin atap ótti. E. Babaqumarovtyń aıtýynsha, kúndelikti eńbek barysynda chempıon atanady.
«Siz sportta alǵashqy qadam jasaǵan qurdastaryńyzdy ǵana emes, eresekterdi de shabyttandyrasyz. Sizderdiń eren jetistikterińizge kómektesetin balalar jattyqtyrýshylaryna alǵys aıtqym keledi. Bul - erekshe mısıa», - dedi ákimniń orynbasary.
Sondaı-aq, Mádenıet jáne sport mınıstri A. Raıymqulova da jyly lebizderin bildirdi. Onyń atynan aıtylǵan alǵys sózde qazaqstandyq sport álemdik sport arenasynda qurmetti orynǵa laıyq delingen. Elimizde chempıondardy tárbıeleýge, deni saý urpaqty ósirýge barlyq jaǵdaı jasalǵan.
Almaty jiu-jitsu kids cup týrnırin Qazaqstannyń Halyq Qaharmany, armıa generaly Saǵadat Nurmaǵambetov atyndaǵy Sagadat Batyr - QTT sport klýby uıymdastyrdy. Munda balalar, jasóspirimder jáne eresekter sportshylar aınalysady. Olar chempıondyq beldikterdi jeńip, jıý-jıtsý men grepplıngten sport sheberi bolady.
Jarysqa 6-15 jas aralyǵyndaǵy 300-den astam jas sportshylar, sonyń ishinde balalar úıiniń tárbıelenýshileri qatysty. Olardyń arasynda Azıa, álem chempıondary men iri halyqaralyq jarystardyń júldegerleri bar. Ákimdiktiń qoldaýymen klýbta «Januıa» otbasy úlgisindegi balalar úıiniń 20 tárbıelenýshisi tegin jattyǵady. Olardyń barlyǵy qajetti jabdyqtarmen qamtamasyz etilgen.
Eske salsaq, jan basyna qarjylandyrý júıesi arqyly balalar sportyn qoldaý maqsatynda Almaty ákimdigi osy jyly 40 myń balany túrli sport seksıalarynda tegin jattyǵýmen qamtamasyz etý úshin 1,5 mıllıard teńge baǵyttady.