Almaty qalalyq Jedel shuǵyl kómek kórsetý aýrýhanasynda kezekti Donor kúni naýqany ótti. Qalalyq qan ortalyǵymen birlesip uıymdastyrylatyn mundaı aksıa aýrýhanada jyl saıyn ótkiziledi.
Qalalyq Jedel shuǵyl kómek kórsetý aýrýhanasynyń bas dárigeri Almaz Djývashev bastaǵan aýrýhana ujymy bul bastamany taǵy bir qoldap, donor atandy.
Dárigerler men medısına mamandary basqalardyń ómirin saqtap qalý úshin únemi qan tapsyrýdyń mańyzdylyǵyn túsinedi. Sonymen qatar, donorlyq donordyń densaýlyǵyn saqtaýǵa, ımýnıtetti arttyrýǵa jáne qannyń jaǵdaıyn jaqsartýǵa kómektesedi.
Donor kúni naýqany – qanǵa muqtaj jandarǵa kómektesý ǵana emes, sonymen qatar árqaısymyzdyń densaýlyǵymyzdy tekserý múmkindigi. Qalalyq qan ortalyǵy qyzmetkerleriniń aıtýynsha, árbir donor óz qanynyń bosqa ketpeıtinine jáne bireýdiń ómirin saqtap qalýǵa kómektesetinine senimdi bola alady.
Byltyr qazanda aýrýhananyń 45 qyzmetkeri 22 lıtr qan tapsyrsa, búgingi naýqanǵa 66 adam qatysty. Aksıaǵa qatysýshylardyń qatarynda buǵan deıin de birneshe ret qan tapsyrǵan qyzmetkerler men mundaı mándi de ıgi isti alǵash ret qolǵa alǵan donorlar da bar. Aýrýhana qyzmetkerleri bul kúni barlyǵy 30 lıtr qan tapsyrdy.
Aýrýhana ákimshiligi qalalyq qan ortalyǵyna aýrýhana qyzmetkerlerine eshqaıda shyqpaı, jumys ornynda qan tapsyrýǵa múmkindik bergeni úshin alǵysyn bildirdi.