Almaty ákimdiginde qala ákimi Darhan Satybaldy men Ortalyq Azıa óńiri boıynsha BYD kompanıasynyń basqarýshy dırektory Aıvan Saomen kezdesti.
Kezdesýdiń negizgi taqyryby Túrksib aýdanynda ornalasqan "Astana Motors" komersıalyq tehnıka zaýyty bazasynda BYD elektrobýstary óndirisin jolǵa qoıý máselesi boldy.
Joba aıasynda iri torapty qurastyrýdan bastap, dánekerleý, shanaq boıaý jáne qosalqy bólshekterdi daıyndaý syndy óndiriste jergilikti úles kezeń-kezeńimen artady. Bul ekologıalyq taza ári energıa únemdeıtin kólik túrine basymdyq bere otyryp, qalalyq kólik ınfraqurylymyn jańǵyrtýdaǵy mańyzdy qadam bolmaq.
BYD Qazaqstanda basty ónimi – B12 markaly elektr avtobýsy óndirisin iske qosýdy josparlap otyr. Bul úlgi kólik shasıine ornatylǵan Blade akýmýlátorlyq batareıasymen jabdyqtalǵan. Mundaı tehnıkalyq sheshim avtobýsqa qosymsha beriktik pen qaýipsizdik berip qana qoımaı, júris qashyqtyǵyn arttyryp, energıa tutynýyn edáýir azaıtady. Blade Battery álemdegi eń qaýipsiz akýmýlátorlardyń biri retinde tanylǵan, oǵan 10 jylǵa deıin kepildik beriledi.
"Ekologıalyq taza kólik túrlerin damytý – Almatynyń strategıalyq basymdyǵy. Elektrobýs óndirisiniń jergilikti deńgeıde iske qosylýy aýaǵa shyǵatyn zıandy zattardy azaıtyp qana qoımaı, jańa jumys oryndaryn ashýǵa, qalanyń óndiristik áleýetin nyǵaıtýǵa múmkindik beredi", — dedi Almaty ákimi Darhan Satybaldy.
Resmı derekke sáıkes, búginde BYD kompanıasy 110 myńnan astam elektr avtobýsyn óndirip, álemniń 400-ge jýyq qalasyna jetkizgen. Olardyń qatarynda AQSH, Eýropa, Azıa, Latyn Amerıkasy men Afrıka elderi bar. Qytaılyq óndirýshi úshin Ortalyq Azıa óńiri, onyń ishinde Qazaqstannyń qolaıly ınvestısıalyq ahýaly men ekologıalyq bastamalarǵa degen suranysy úlken qyzyǵýshylyq týdyryp otyr.
Almatyda BYD elektrobýstaryn óndirý elimizdiń jasyl ekonomıkany damytý men turaqty qalalyq kólik júıesin qalyptastyrý jónindegi strategıalyq maqsatyn júzege asyrý jolyndaǵy mańyzdy qadam bolmaq.