54 jedel-tergeý toby quryldy
Megapolıste terorıstik áreketter barysynda kásipkerlerge keltirilgen zalaldy anyqtaý jónindegi qalalyq komısıa jumysyn jalǵastyrýda, dep habarlaıdy Almaty-akshamy.kz.
Óńirlik komýnıkasıalar qyzmetiniń brıfıńinde Almaty Polısıa departamenti tergeý basqarmasy basshysynyń orynbasary Erǵalı Ibraımov atap ótkendeı, tergeý áreketterin júrgizgenge deıin buzaqy áreketter men búlingen múliktiń izderin tazalamaý kerek, eń aldymen polısıa shaqyrý kerek. Onyń aıtýynsha, 54 jedel-tergeý toby quryldy. Basqa óńirlerden 37 tergeýshi men 51 krımınalıs kómekke tartyldy. Sondaı-aq, polısıa qyzmetkerleri saýda ortalyqtarynda – OÁD, Moskva jáne Promenadta ótinishterdi qabyldaıdy.
Erǵalı Ibraımov beınebaqylaý kameralarynan, resıverlerden, serverlerden jáne t.b. jazbalardy qatty dıskige nemese flesh-kartaǵa qaıta jazýdy jáne osy jazbalardy quqyq qorǵaý organdarynyń ókilderine berýdi óte suraıdy.
«Eger kásipker tergeýshiniń kelýin kútpese jáne tazartý jáne qalpyna keltirý jumystaryn júrgizse, qarjylyq qujattardan basqa, keltirilgen zalaldy óteý týraly máseleni qaraý úshin negiz bolatyn foto jáne vıdeo málimetterin usyný qajet», - dedi ol.
Polısıa oqıǵa bolǵan jerdi teksergennen keıin hattamamen tanysyp, qajet bolǵan jaǵdaıda tolyqtyrýlar jasap, tergeýshiniń málimetterin, tirkeý nómirin surap, tergeýshiden jábirlenýshi retinde taný týraly qaýly alý kerek.
«Qarjylyq qujattardyń rastalǵan kóshirmelerin, búlingen nemese urlanǵan múliktiń tizilimin tergeý organdaryna usyný qajet. Budan basqa, polısıa qyzmetkerlerinen alynǵan qujattarmen, sondaı-aq úı - jaıǵa, jabdyqqa, ónimge quqyq belgileıtin qujattarmen (júkqujattar, shot-faktýralar, kiris aktileri jáne t.b.) aýdandyq ákimdiktegi tıisti komısıaǵa júginý qajet», - dep habarlady Ibragımov.
Joǵaryda kórsetilgen qujattary joq kásipkerler úshin qazirgi ýaqytta zalaldy baǵalaý tetigi ázirlenip jatqany atap ótildi.
Tergeý amaldary júrgizilgennen keıin zaqymdalǵan obektide jóndeý jumystaryn júrgizýge jáne qyzmetti qaıta bastaýǵa bolady.