2025 jyly Almaty búdjetiniń 40%-y áleýmettik salaǵa baǵyttalady
Almaty máslıhaty 2025-2027 jyldarǵa arnalǵan búdjetti bekitti. Qujatqa sáıkes, kelesi jyly Almatyda áleýmettik salaǵa 851,9 mlrd teńge qarastyrylǵan, bul qala búdjeti shyǵyndarynyń shamamen 40%-y. Osylaısha, 2025 jyly áleýmettik salaǵa bólinetin qarjy 15%-ǵa artady. 2024 jyly áleýmettik salaǵa 741,2 mlrd teńge, al 2023 jyly 664,5 mlrd teńge bólingen edi.
Bul somanyń ishinde densaýlyq saqtaý salasyna 55,8 mlrd teńge bólindi.
2025 jyly densaýlyq saqtaý ınfraqurylymyn jańǵyrtýǵa bólinetin qarjy 15%-ǵa ulǵaıtylady. Sondaı-aq, 1326 dáriger men medısına qyzmetkerlerin úsh deńgeıli oqytý baǵdarlamasyn iske asyrý jalǵasady.
Jańa búdjettiń bir bóligi №4 jedel medısınalyq járdem qosalqy stansıasynyń, eki otbasylyq-dárigerlik ambýlatorıanyń jáne Bostandyq aýdanyndaǵy kúnine 500 adam qabyldaıtyn jańa emhananyń qurylysyn aıaqtaýǵa jumsalady. Qalalyq medısınalyq mekemeler qajetti dári-dármekpen jáne jabdyqtarmen, sonyń ishinde vaksınalar men ımmýnoprofılaktıkaǵa arnalǵan preparattarmen qamtamasyz etiledi.
Sırek kezdesetin aýrýlary bar 4 myńnan astam pasıent tegin dári-dármekpen qamtamasyz etiledi. 2025 jyly jedel járdem avtoparkyn jańartý jalǵasady, bul maqsatta 50 kólik satyp alý josparlanýda. Sonymen qatar, 2024-2025 jyldary 20 densaýlyq saqtaý nysanyn kúrdeli jóndeý kózdelgen, onyń 10-yn 2025 jyly aıaqtaý josparlanýda. Densaýlyq saqtaý salasyndaǵy 30 jańa jáne eskirgen nysandy jobalaý jumystary da jalǵasýda.