Bul týraly qalanyń úsh jyldyq búdjeti bekitilgen Máslıhattyń kezekten tys sesıasy kezinde belgili boldy.
2025 jyly Almaty qalasynyń aýmaǵynda úsh deńgeıli kógaldandyrý boıynsha aýqymdy jumystar bastalady, onda birinshi deńgeı kógaldar men gúlzarlardan, ekinshi deńgeı – butalar men sándik ósimdikterden, al úshinshisi - iri aǵashtardan turatyn bolady, dep habarlaıdy aqshamnews.kz
Barlyǵy 27 myńǵa jýyq iri aǵash otyrǵyzý josparlanýda, onyń 23 myńynyń bıiktigi 4 metrden, al 4 myńynyń bıiktigi 6 metrden asady.
"Qalany abattandyrý jáne kógaldandyrý – jaıly qalalyq orta qurý jáne almatylyqtardyń ómir súrý sapasyn arttyrý boıynsha bizdiń basty basymdyǵymyz", - dep atap ótti Erbolat Dosaev.
Ekpeler jalpyǵa ortaq paıdalanylatyn jerlerde: magıstraldyq kósheler boıynda, saıabaqtarda, skverlerde, býlvarlarda jáne basqa da qoǵamdyq keńistikterde júrgiziletin bolady. Bul tásil qysqa merzimde kóleńkeler men jasyl aımaqtardy qurýǵa múmkindik beredi, bul ásirese qalanyń tyǵyz qonystanǵan aýdandary úshin óte mańyzdy.
Joba aǵashtardy otyrǵyzý men kútýdiń zamanaýı ádisterin qoldanýdy qarastyrady. Otyrǵyzýdan keıin eki jyl ishinde ekpelerge júıeli kútim, sonyń ishinde tamshylatyp sýarý jáne avtomatty sýarý júıelerin ornatý, sondaı-aq aǵashtar men butalardy jergilikti jaǵdaılarǵa beıimdelgen mıneraldy tyńaıtqyshtarmen qorektendirý uıymdastyrylady, bul olardyń ómir súrýin tezdetedi.
Kógaldandyrý ekologıalyq jaǵdaıdy jaqsartýǵa jáne qalalyq ortanyń sapasyn arttyrýǵa baǵyttalǵan. İri aǵashtardy otyrǵyzý tolyqqandy jasyl ınfraqurylymdy qalyptastyrý ýaqytyn qysqartýǵa jáne turǵyndar úshin qolaıly jaǵdaı jasaýǵa múmkindik beredi.