QR Premer-Mınıstri Álıhan Smaıylov pen TAV Airports Holding kompanıasynyń prezıdenti Serkan Kaptan Almaty áýejaıynyń jańa halyqaralyq termınalynyń qurylysyn jáne elimizde ózge de ınfraqurylymdyq jobalardy iske asyrý máselelerin talqylady.
Kezdesý barysynda Úkimet elimizdiń kólik-logıstıka áleýetin arttyrýǵa úlken kóńil bóletini atalyp ótti. Sondyqtan Almatyda jańa halyqaralyq termınal qurylysy syndy úlken jobany júzege asyrý startegıalyq mańyzǵa ıe, dep habarlaıdy Almaty-akshamy.kz Primeminister.kz-ke silteme jasap.
«Onyń ashylýy jolaýshylar aǵynyn arttyryp, ushý geografıasyn keńeıtedi jáne megapolıs turǵyndary men qonaqtaryna sapaly qyzmet pen jaılylyqtyń joǵary deńgeıin qamtamasyz etedi dep kútemiz»,— dedi Álıhan Smaıylov.
TAV Airports Holding basshysy jobany iske asyrý barysy jóninde jańa aqparatpen bólisti. Onyń aıtýynsha, búginde qurylys jumystary 87%-ǵa aıaqtalǵan. Jańa termınal bıylǵy maýsymda ashylady dep josparlanyp otyr.
Jalpy byltyr Almaty áýejaıy jolaýshylar aǵynynyń rekordtyq deńgeıin tirkedi. Qoldanystaǵy termınal tek ishki reısterge ǵana paıdalanylady. Bul rette eki termınaldyń áleýeti jylyna 14 mln jolaýshyǵa jetedi. Áýe aılaǵy arqyly júk tasymaly kólemin 100 myń tonnaǵa deıin arttyrý josparlanǵan.
Premer-Mınıstr Almaty áýejaıy temirjol jáne avtomobıl tasymalyn qosa alǵanda, tolyqqandy mýltımodaldy kólik-logıstıka haby retinde damýy kerek ekenin atap ótti. Investor aldaǵy josparlarynda muny eskerýi tıis.