Túrkıa Respýblıkasynyń Almaty qalasyndaǵy Bas konsýldyǵy men Eýrazıa ǵylymı-zertteý ınstıtýty birlesip «15 shilde – Demokratıa jáne Ulttyq birlik» kúni atty panel ótkizdi.
Basqosýda Bas konsýl Evren Múderisoǵlý, Ahmet Iasaýı ýnıversıtetiniń Ókiletti keńesiniń tóraǵasy, profesor doktor Muhıttın Shımshek, Eýrazıa ǵylymı-zertteý ınstıtýtynyń dırektory Sýat Beılýr, Túrki dúnıesi Jazýshylar Odaǵynyń tóraǵasy Ulyqbek Esdáýlet, Jazýshylar Odaǵy Basqarmasynyń hatshysy Qanseıit Ábdezuly syndy ǵalym-zertteýshiler, zıaly qaýym jáne BAQ ókilderi qatysty.
Bas konsýl Evren Múderisoǵlý 2016 jyldyń 15 shildesinde Túrkıada bolǵan aýyr oqıǵa – áskerı tóńkeris áreketiniń sebepteri men saldaryn jan-jaqty atap ótti.
«15-shilde – tek Túrkıa halqy úshin ǵana emes, búkil demokratıalyq qoǵamdar úshin úlken syn saǵaty boldy. FETO lańkestik uıymynyń memlekettik tóńkeris jasaýǵa baǵyttalǵan áreketi – halyq erkine, zańdylyqqa, ulttyq egemendikke qarsy jasalǵan qastandyq edi. Alaıda túrik halqy sol túni birlik pen batyldyqtyń jarqyn úlgisin kórsetti. Kóshege shyǵyp, eshbir qarýǵa súıenbeı, tek júrektegi senimmen óz memleketin, óz demokratıasyn qorǵap qaldy»,-dep atap ótti.
Ahmet Iasaýı ýnıversıtetiniń Ókiletti keńesiniń tóraǵasy, profesor doktor Muhıttın Shımshek qıyn-qystaý sátte baýyrlas elderdiń qastarynan tabylǵanyn aıryqsha atap ótti. Bul qaraly oqıǵadan keıin Túrkıaǵa alǵash bolyp memlekettik sapardy Qazaqstan Prezıdenti jasaǵanyna toqtaldy.
Jazýshylar Odaǵy Basqarmasynyń hatshysy Qanseıit Ábdezuly «Bul oqıǵa bizge demokratıanyń, zań ústemdiginiń jáne ulttyq birliktiń qanshalyqty qymbat qundylyq ekenin taǵy bir márte eske salady.15 shilde oqıǵasynan bolsyn, bizde bolǵan Qańtar oqıǵasynan bolsyn úlken sabaq alýymyz kerek»,-dedi.
Jıynǵa qatysqandar tóńkeris áreketine qarsy turyp, ómirin qıǵan barlyq azamattardyń rýhyna taǵzym ete otyryp, demokratıa men erkindik jolyndaǵy kúres – máńgilik qundylyq ekenin atap ótti.