Almaty ákimi Erbolat Dosaevtyń halyqpen segizinshi kezdesýi Túrksib aýdanynda ótti. Kezdesýge 300-den astam adam keldi, dep habarlaıdy Almaty-akshamy.kz.
Túrksib aýdany qalanyń ónerkásiptik, kóliktik jáne logıstıkalyq toraby bolyp tabylady. Onyń úlesine Almatynyń ónerkásiptik óndirisiniń tórtten bir bóligi tıesili. Almaty ákiminiń málimetinshe, bıylǵy 5 aıdyń qorytyndysy boıynsha ónerkásipte, ınvestısıa tartýda, qurylysta oń dınamıka baıqalady.
Kezdesý barysynda Almaty ákimi aýdannyń negizgi problemalyq máselelerin, onyń ishinde ınjenerlik jeliler men turǵyn úı qorynyń tozýyn atap ótti. Erbolat Dosaev jylytý, sýmen jabdyqtaý jáne káriz jelilerin jańǵyrtý, turǵyn úı qoryn kúrdeli jóndeý, áleýmettik ınfraqurylymdy jaqsartý jáne damytý qajet ekenin atap ótti.
Bıyl qalaǵa qosylǵan Álmerek, Qaırat, Nurshashqan shaǵyn aýdandaryndaǵy úılerdiń 90%-y úshin ýchaskeler shekarasyna deıin sýmen jabdyqtaý men kárizdiń magıstraldy jáne ishki aýlalyq jelileri salyndy. Jyl sońyna deıin Zakarpatskaıa kóshesinde, Jas qanat jáne Shýaqty shaǵyn aýdandarynda jeliler salynady. Bul taǵy myń úıdi qosýǵa múmkindik beredi. Nıjnáá pátıletka shaǵyn aýdanynda jumystardy kelesi jyldyń sońynda aıaqtaý josparlanýda. Budan basqa, osy jyldyń sońyna deıin aýdanda uzyndyǵy 8,3 km bolatyn 11 ýchaskesindegi jeliler qaıta jańǵyrtylatyn bolady.
Óziniń sózinde Erbolat Dosaev aýdanda elektrmen jabdyqtaý jelileri 70%-ǵa tozǵanyn atap ótti. Bul jıi úzilisterge, ajyratýlarǵa jáne kerneýdiń joǵarylaýyna ákeledi. Máseleni sheshý úshin Tuzdybastaý qosalqy stansıasy salynýda. Jyl sońyna deıin Shýaqty shaǵynaýdandaǵy elektr berý jelileri jańǵyrtylady. Shilde aıynda Nurshashqan, Qaırat jáne Álmerek shaǵynaýdandarynda jumystar bastalady.
Aýdanda qalanyń barlyq eski turǵyn úıleriniń 40%-y shoǵyrlanǵan. Osy jyly atalǵan máseleni sheshý úshin 12 eski úıdiń 96 otbasy 2 jańa kópqabatty úılerge kóshirildi. 211 páterli taǵy 8 kópqabatty úıdiń qurylysy júrgizilýde.
Aýdannyń jol ınfraqurylymy qanaǵattanarlyq jaǵdaıda – 439 nemese 486 kósheniń 90%-y asfálttalǵan. Qalǵan 47 kósheniń 17-niń 10,2 shaqyrymyna ortasha jóndeý jumystary júrgiziledi.
Erbolat Dosaev jyl sońynda Qulja traktisi-Buqtyrma qıylysynda jolaıryǵynyń qurylysy aıaqtalatynyn habarlady.
Aýdanda jańbyr kezinde únemi sý basý baıqalady. Bul máseleni jedel sheshý úshin uzyndyǵy 5,1 km bolatyn 64 ýchaskede uzyndyǵy aryqtar salynyp, rekonstrýksıalanýda, kelesi jyly uzyndyǵy 44 km qalǵan aryq júıelerin salý jáne jóndeý josparlanǵan.
Qaýipsizdikti qamtamasyz etý maqsatynda aýdan joldaryndaǵy «Sergek» kameralarynyń sany eki esege jýyq – 82-den 160-qa deıin ulǵaıtylatyn bolady. Qosymsha 322 beınebaqylaý kamerasy ornatylady, olardyń bir bóligi qıylystarda, aýlalarda, saıabaqtar men skverlerde, bilim berý jáne densaýlyq saqtaý obektilerinde, dinı nysandar men bazarlarda ornatylatyn bolady.
Túrksib aýdanynda joǵary jyldamdyqty ınternetke qosylý jumystary jalǵasýda. Talshyqty-optıkalyq jelige 342 úı, sonyń ishinde Qaırat, Álmerek shaǵyn aýdandary qosyldy. Jyl sońyna deıin Baým toǵaıy men Nıjnáá pátıletka shaǵyn aýdandaryn qosý josparda bar.
Qala basshysy Túrksib aýdanynda áleýmettik nysandarmen qamtamasyz etý qalanyń basqa aýdandaryna qaraǵanda joǵary ekenin atap ótti. Aýdannyń mektepteri men balabaqshalarynda oryn tapshylyǵy 4,2 myń oryndy quraıdy. Jyl sońynda Qaırat shaǵynaýdandaǵy 1500 oryndy mektep pen Volochaevskaıa kóshesindegi 300 oryndy jeke menshik mekteptiń qurylysy aıaqtalady dep kútilýde. Bul Túrksib aýdanyndaǵy oqýshy oryndarynyń tapshylyǵy máselesin tolyq sheshýge múmkindik beredi.
Úshinshi toqsanda №59 mektep-gımnazıa úshin jańa ǵımarattyń qurylysy bastalady. Jyl sońyna deıin Jas qanat shaǵynaýdanyndaǵy balabaqshada qurylys jumystary qaıta bastalady. Kelesi jyldyń mamyr aıynda №70 balabaqshanyń seısmoturaqtylyǵyn kúsheıtý aıaqtalady. 2023 jyldyń sońyna deıin Qaırat shaǵynaýdanynda 260 oryndyq balabaqshanyń qurylysy aıaqtalady.
Halyqtyń ósýiniń arqasynda aýdannyń medısınalyq mekemelerine júkteme edáýir artty. Bıyl Aıbasov kóshesindegi 200 oryndyq emhananyń jobalyq qujattamasy ázirlendi. Osy jyldyń úshinshi toqsanynda Nurshashqan shaǵyn aýdanynda 100 oryndyq emhana qurylysy bastalady. Álmerek jáne RV-90 shaǵyn aýdandarynyń árqaısysynda 200 oryndyq eki emhananyń qurylysyna jobalyq-smetalyq qujattama ázirlenetin bolady. Qazirgi ýaqytta Qaırat shaǵyn aýdanynda 340 oryndyq emhana qurylysynyń jobalyq qujattamasy ázirlenýde.
№20 qalalyq emhananyń dárigerlik ambýlatorıasyn turaqty ornalastyrý úshin 13 áskerı qalashyqta jalǵa beriletin ǵımaratty satyp alý josparlanýda.
Túrksib aýdanynda turǵyndar úshin sport nysandarynyń «qadamdyq qoljetimdiligin» qurý boıynsha jumys jalǵasýda. Osy jyldyń naýryz aıynda «Juldyz» shaǵyn aýdanynda baseıni, gımnastıkamen, jekpe-jekpen aınalysýǵa arnalǵan zaldary bar jeke deneshynyqtyrý-saýyqtyrý kesheni ashyldy, jyl sońyna deıin Jas Qanat shaǵyn aýdanynda baseıni bar taǵy bir sport kesheni iske qosylady. Qazan aıynda «Avıator» stadıonynyń jáne Ogarev kóshesindegi damý jáne shyǵarmashylyq ortalyǵynyń aýmaǵynda sport kesheniniń qurylysyna memlekettik saraptama qorytyndysyn alý josparlanýda.
Bıyl «Halyqtyq búdjetke qatysýy» jobasyna aýdanǵa 800 mln teńge bólindi. Turǵyndardyń usynystary boıynsha 28 joba irikteldi. Olardyń ishindegi eń irileri – Seıfýllın dańǵyly boıyndaǵy kireberis topty abattandyrý. Rysqulov dańǵyly, Aqkerbez kóshesi boıyndaǵy jaǵalaý aımaǵyn qaıta jańartý, Maılın kóshesi boıyndaǵy saıabaqty bólý. Jumystar aǵymdaǵy jyldyń sońyna deıin aıaqtalady.
Almaty ákimimen kezdesý barysynda turǵyndar joldardy, káriz jáne elektr jelilerin jóndeý, abattandyrý jáne t. b. máselelerdi kóterdi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýlerdiń jańa formatyna sáıkes jyl sońyna deıin Erbolat Dosaev Halyqpen 24 kezdesý ótkizedi – toqsanyna 8 aýdannyń turǵyndarymen bir-bir kezdesý.
Eske salsaq, Almaty ákiminiń turǵyndarmen birinshi kezdesýi bıylǵy jyldyń ekinshi toqsanynda 14 sáýirde Bostandyq aýdanynda, ekinshisi – 28 sáýirde Alataý aýdanynyń turǵyndarymen, úshinshisi – 12 mamyrda Áýezov aýdanynda, tórtinshisi – 19 mamyrda Naýryzbaı aýdanynda, besinshisi – 26 mamyrda Jetisý aýdanynda, altynshysy – 17 maýsymda Medeý aýdanynda, jetinshisi – 23 maýsymda Almaly aýdanynda ótti.