Osy arqyly osy aýdandaǵy mektepterdegi oryn tapshylyǵy sheshiledi.
Ústimizdegi jyldyń jeltoqsan aıyna deıin almatylyq qurylysshylar Túrksib aýdanyndaǵy eki mekteptiń qurylysyn aıaqtaıdy.Bul týraly Almaty ákimi Erbolat Dosaev aýdan halqymen ótken kezdesý barysynda aıtty, dep habarlaıdy Almaty-akshamy.kz.
Shahar jetekshisiniń sózine júginsek, búgingi tańda Almatynyń Túrksib aýdanynda mektepter men bala baqshalardaǵy oryn tapshylyǵy jıyntyqta 4,2 myń oryndy quraıdy (1,5 myń - mektep, 2,7 myń – mektepke deıingi uıymdar). Oryn tapshylyǵyn azaıtý maqsatynda bilim berý uıymdaryn salý jáne jóndeý jobalary iske asyrylyp jatyr.
«2022 jyldyń jeltoqsan aıynda «Qaırat» shaǵynaýdanyndaǵy 1500 oryndyq mektep pen Volochaevskaıa kóshesindegi 300 oryndyq jeke menshik mekteptiń qurylysyn aıaqtaý josparlanǵan. Bul qazirgi oryn tapshylyǵyn tolyǵymen sheshedi.Osy jyldyń 3-shi toqsanynda № 59 mektep-gımnazıanyń jańa ǵımaratyn salý bastalady. 1939 jyly salynǵan eski ǵımarat buzylady. Jyldyń sońyna deıin «Jas Qanat» shaǵyn aýdanynda 280 oryndyq bala baqshanyń qurylys jumystary qaıta bastalady», - dedi qala ákimi.
Erbolat Dosaevtyń aıtýynsha, 2023 jyldyń mamyrynda Stahanovskaıa kóshesindegi №70 arnaıy bóbekjaı bala baqshanyń ǵımaratyn seısmıkalyq kúsheıtý jáne 2023 jyldyń sońyna deıin «Qaırat» shaǵynaýdanyndaǵy 260 oryndyq balabaqshanyń qurylys jumystary aıaqtalady.
«Búgingi kúni №198 jáne №195 2 mektepterdiń 1050 oryndyq qosymsha qurylystarynyń jáne 480 oryndyq 2 bala baqshanyń qurylysyna, №50 mektepti seısmıkalyq kúsheıtýge jobalaý-smetalyq qujattama ázirlenýde», - dep aıtty qala ákimi.