Darhan Satybaldy Túrksib aýdanyndaǵy birqatar ónerkásip nysanyn aralady. Jumys sapary barysynda Almaty kópir qurylymdary zaýytyna, «Almaty Mai» kásiporny jáne «405 Avıajóndeý zaýytyna» bardy.
Eń áýeli ákim 1963 jyly irgetasy qalanǵan Almaty kópir qurylymdary zaýytyna bardy. Qazirgi tańda kásiporyn jol, kópir, tonnel, áýejaı jáne túrli óndiristik nysandardyń qurylysyna arnalǵan 360-tan astam temirbeton ónimin shyǵarady.
Zaýytta 450 adam eńbek etedi. Zaýyt eýropalyq standarttarǵa sáıkes kópir bloktaryn jáne jańa úlgidegi temirjol shpaldaryn shyǵaratyn ınovasıalyq jelilerdi iske qosqan.
Darhan Satybaldy mundaı kásiporyndar qalanyń ǵana emes, tutas eldiń kólik ınfraqurylymyn damytýda strategıalyq mańyzy zor ekenin aıtty.
Odan keıin ákim «Almaty Mai» zaýytynda boldy. Bul kásiporyn maıly daqyldardy óńdeýmen qatar, ósimdik maıy, margarın jáne basqa da ónimder shyǵarady. Óndiris táýligine 500 tonna raps pen 450 tonna qytaıburshaq óńdeı alady.
2025 jyly qańtar-shilde aılarynda óndiris kólemi 96,5 myń tonnadan asty. Zaýytta 474 adam jumys isteıdi. Ónimderi Ortalyq Azıa elderine jáne Qytaıǵa eksporttalady.
Ákimniń aıtýynsha, osyndaı óndiris oryndarynyń damýy Almatynyń azyq-túlik qaýipsizdigin arttyryp, jańa eksporttyq múmkindikterge jol ashady.
Qala basshysy sapar sońynda 85 jyldyq tarıhy bar «405 Avıajóndeý zaýyty» Aksıonerlik qoǵamyn da kórip shyqty. Munda azamattyq jáne qos maqsattaǵy áýe tehnıkasyna kúrdeli jóndeý, jańǵyrtý jáne tehnıkalyq qyzmet kórsetiledi, sondaı-aq, lısenzıalyq negizde tikushaq óndirisin jolǵa qoıý jobalary júzege asyrylyp jatyr.
Kásiporynda 550-den astam maman eńbek etedi, onyń ishinde 350-den astamy ınjener men tehnık. Aldaǵy ýaqytta joǵary tehnologıalyq salada qosymsha 150 jumys ornyn ashý josparlanǵan.
«405 Avıajóndeý zaýyty» AQ-nyń atqaryp otyrǵan jumystarynyń mańyzdylyǵyn jáne kásiporynnyń eldiń qorǵanys-ónerkásip kesheni úshin strategıalyq mánin eskere otyryp, Almaty ákimidigi tarapynan jan-jaqty qoldaý kórsetiledi», – dedi Darhan Satybaldy.
Sapar qorytyndysynda -Almaty ákimi Túrksib aýdanyndaǵy ónerkásiptik kásiporyndardyń turaqty ósim kórsetip, qala ekonomıkasyna aıtarlyqtaı úles qosyp otyrǵanyn jetkizdi.
«Mundaı óndiris oshaqtary – Almatynyń ındýstrıalyq damýynyń berik tiregi. Munda jańa jumys oryndary ashylyp, ınovasıa engizilýde, eksporttyq áleýet artyp keledi. Bizdiń mindetimiz – osy kásiporyndarǵa qoldaý kórsetip, olardyń odan ári jańǵyrýyna jaǵdaı jasaý», – dedi Darhan Satybaldy.