Almatyda Prezıdenttiń sıfrlandyrý men jasandy ıntellektti damytý jónindegi tapsyrmalary júzege asyrylyp keledi
Almaty qalasynyń ákimi Darhan Satybaldy jumys sapary aıasynda shahardyń iri kásiporyndarynyń biri «Caspian Beverage Holding» aksıonerlik qoǵamynyń jumysymen jáne MOST IT Hub Almaty ınovasıalyq alańymen tanysty, - dep habarlaıdy Aqshamnews.kz.
1964 jyly qurylǵan Caspian Beverage Holding zaýytynda qala basshysy óndiristik úderister men kásiporynnyń ekologıalyq bastamalaryn kórip qaıtty. Kompanıa táýligine 500 myńǵa deıin sýsyn bótelkesin shyǵarady, 500 adamdy jumyspen qamtyp otyr jáne jyl saıyn shamamen 2 mlrd teńge kóleminde salyq tóleıdi.
Kásiporyn ornyqty damý tehnologıasyn belsendi túrde engizip keledi. Sonyń biri kómirqyshqyl gazyn qaıta óńdeýdiń tuıyq sıkli, bul aýaǵa taraıtyn zıandy shyǵaryndylardy edáýir azaıtýǵa múmkindik beredi.
Darhan Satybaldynyń aıtýynsha, mundaı ekologıalyq jaýapkershiligi joǵary óndirister qalanyń ekonomıkalyq damýyna jáne tabıǵatty aıalaýǵa negizdelgen «jasyl ekonomıkanyń» órkendeýine eleýli úles qosady.
Sapar barysynda ákim MOST IT Hub Almaty – startaptar men tehnologıalyq kásipkerlikti damytýǵa arnalǵan zamanaýı ınovasıalyq ortalyqqa bardy. Habta 80-nen astam IT-kompanıa shoǵyrlanǵan, olar ınovasıalyq jáne ǵylymı jobalardy júzege asyryp keledi. Munda akselerasıalyq jáne bilim berý baǵdarlamalary, venchýrlyq bastamalar men jasandy ıntellekt zerthanalary jumys isteıdi.
Kezdesý barysynda qala basshysy IT-salany jáne jasandy ıntellekt tehnologıalaryn damytý – Prezıdent Qasym-Jomart Toqaev aıqyndaǵan negizgi basymdyqtardyń biri ekenin atady.
«Memleket basshysynyń sıfrlandyrý men jasandy ıntellektti damytý jónindegi tapsyrmalary aıasynda eń bastysy, startaptardy ǵana emes, ómir sapasyn jaqsartatyn, Almatyny aqyldy, yńǵaıly ári qaýipsiz qalaǵa aınaldyratyn naqty sheshimderdi engizý. Biz qala men turǵyndarǵa paıda ákeletin IT-jobalardy qoldaýǵa daıynbyz», – dedi Darhan Satybaldy.
Ákimniń aıtýynsha, ónerkásip pen IT-sektor Almatynyń turaqty damýynyń negizgi qozǵaýshy kúshi. Olar jańa jumys oryndaryn quryp, ınvestısıa tartyp, megapolıstiń tehnologıalyq áleýetin arttyrýǵa jol ashady.