Shahardaǵy JES gazǵa kóshirgende, almatylyqtar aýanyń tazarǵanyn sezine bastaıdy.
Almaty ákimi Baqytjan Saǵyntaev «Almaty» telearnasynyń tikeleı efırinde ótken ınjenerlik ınfraqurylymdy damytýdyń onlaın-prezentasıasy barysynda megapolıstiń ekologıasyn jaqsartý máselesine toqtalyp ketti, dep habarlaıdy Almaty-akshamy.kz.
Baqytjan Saǵyntaev óz sózinde qaladaǵy jylý elektr stansalary gazǵa kóshkende, qala mańyndaǵy eldi mekenderdiń turǵyndary úılerin kómirmen emes, gazben jylyta bastaǵanda, almatylyqtar qala aýasynyń jaqsarǵanyn sezine bastaıdy degendi aıtty.
«Bizdiń qalamyzdyń aýasyn jylý elektr stansasy 27-30% lastaıdy, ıaǵnı 38 tonna zıandy zat shyǵarady, oǵan qala mańyndaǵy kómir jaǵyp otyrǵan úılerdi qosyńyz. Jylý elektr stansasy da, úılerin qysta kómirmen jylytatyn jeke sektor da qalanyń tómen jaǵynda ornalasqan. Sol sebepten tómen jaqtan shyqqan bult qala aýasyn lastap keledi. Al qaladaǵy JEO-2 jáne JEO-3 gazǵa kóshirsek, shahar mańyndaǵy úıler gazǵa aýyssa, almatylyqtar aýanyń tazarǵanyn birden sezine bastaıdy», – dedi Baqytjan Saǵyntaev.
Sonymen qatar qala ákimi túrli ǵalymdardyń Almaty ekologıasyn jaqsatýǵa arnalǵan usynystary baryn aıtty. Almaty ekologıasyn jaqsartý maqsatynda sonyń barlyǵy zerttelýi tıis.
Jospar boıynsha, Almatyda JEO-2 men JEO-3 2024-2025 jyly tolyǵymen gazǵa aýysady dep kútilýde.