Almaty ákimi Erbolat Dosaevtyń halyqpen kezekti kezdesýi Naýryzbaı aýdanynda ótti. Qala basshysy aýdannyń damýy jáne turǵyndardan kelip túsken usynystar boıynsha atqarylǵan jumystar týraly aıtty. Kezdesýge 250-den astam adam keldi dep habarlaıdy, Almaty-akshamy.kz.
Qala ákimi Erbolat Dosaev atap ótkendeı, aýdannyń negizgi ózekti máselesi halyqty sýmen qamtamasyz etý bolyp qala beredi. Jaǵdaıdy sheshý úshin «Qarǵaly» jáne «Aqsaı» eki sý qoımalarynyń qurylysy júrgizilýde.
«Qarǵaly» boıynsha jumystar 80%-ǵa aıaqtaldy. Ákimniń aıtýynsha, İle-Alataý ulttyq parki aýmaǵynda qosymsha ruqsat qujattardy alý qajettiligine baılanysty qurylys ýaqytsha toqtatyldy. Búginde jumystar qaıta jandandy. Sý tartýdy tapsyrýdyń josparlanǵan merzimi 2023 jyldyń 3 toqsany.
«Aqsaı» sý qoımasy boıynsha konkýrstyq rásimder aıaqtaldy, qurylys-montaj jumystaryna qarjy bólindi, merdigerlik uıym anyqtaldy, qurylys júrgizilýde. Paıdalanýǵa berýdiń josparlanǵan merzimi 2025 jyldyń 3 toqsany. Jazǵy ýaqytta, «Aqsaı» jobasyn iske asyrý kezeńinde sorǵy stansıalary bar magıstraldyq sý tartqyshy salynatyn bolady, ol Almaty jer asty sýlarynan tolyǵady.
Jol ınfraqurylymynyń sapasyn arttyrý maqsatynda "Taýsamaly", "Tastybulaq" shaǵynaýdandarynda uzyndyǵy 10 km 6 kóshege ortasha jóndeý júrgizildi. Jyl sońyna deıin aýdanda uzyndyǵy 49 shaqyrym bolatyn 50 kósheni jóndeý jumystary josparlanǵan.
Qala ákimi atap ótkendeı, jaýyn-shashyn kezinde sý basý máselesi aýdanda erekshe ózekti másele bolyp qalýda. Aýdan boıynsha turaqty sý basýdyń 6 ýchaskesi anyqtaldy. Máseleni tolyq sheshý úshin, TJ jelisi boıynsha jyl sońyna deıin Oıjaılaý ózeniniń arnasy nyǵaıtylady, Raıymbek dańǵyly boıymen Aqsaı ózenine deıin burý kanaly jaılastyrylady, uzyndyǵy 800 metr aryq jelisi salyndy.
Oqýshy oryndarynyń tapshylyǵyn tómendetý maqsatynda aýdanda 2022 jyldyń 1 qyrkúıegine qaraı 2 400 oryndyq 2 mektep ashý josparlanǵan. Jyl sońyna deıin 2700 oryndyq taǵy 2 mekteptiń qurylysy aıaqtalady. Sonymen qatar, "Shuǵyla" shaǵynaýdanynda 2023 jyldyń 3 toqsanyna 1200 oryndyq eki mektepti tapsyrý josparlanǵan. "Quramys" shaǵynaýdanynda 2800 oryndyq mektepter salynady.
Mektepke deıingi oryndar tapshylyǵy máselesin sheshý úshin aǵymdaǵy jyly "Shuǵyla" shaǵynaýdanynda 320 oryndyq balabaqsha qurylysy bastaldy. Aıaqtalý merzimi 2023 jyldyń 2 toqsany. Sonymen qatar, 800 oryndyq 3 balabaqsha boıynsha JSQ ázirleýge qujattama daıyndalýda.
Megapolıs ákiminiń aıtýynsha, aýdanda emhanalardyń shamadan tys júktelýi máselesi ótkir tur. Bul máseleni sheshý úshin 500 kelýshige arnalǵan 2 jańa emhana men dárigerlik ambýlatorıa salý josparlanýda.
«Halyq qatysatyn búdjet» jobasy aıasynda aǵymdaǵy jyly qarjylandyrý kólemi 600 mln teńgege, ıaǵnı 1 mlrd 800 mln teńgege deıin ulǵaıtyldy. 47 joba iriktelip alyndy, onyń 20-sy aıaqtaldy. Atalǵan jobalar aıasynda balalar, workout alańdary, sport aımaqtary, jaıaý júrginshiler men saıabaq aımaqtaryn abattandyrý qarastyrylǵan.
Almaty ákimimen kezdesý barysynda turǵyndar joldardy, káriz jáne elektr jelilerin jóndeý, abattandyrý jáne t.b. máselelerdi kóterdi.
Memleket Basshysy Qasym-Jomart Toqaevtyń Jarlyǵymen bekitilgen halyqpen kezdesýlerdiń jańa formatyna sáıkes jyl sońyna deıin Erbolat Dosaev halyqpen 24 kezdesý ótkizedi – toqsanyna 8 aýdannyń turǵyndarymen bir-bir kezdesý.