Mamyr aıynan beri aýdan kósheleri jóndelip jatyr.
Aýdanda joldyń sapasyn arttyrý maqsatynda "Taýsamaly", "Tastybulaq" shaǵynaýdandarynda uzyndyǵy 10 km bolatyn 6 kóshe ortasha jóndeýden ótti, dep habarlaıdy Almaty-akshamy.kz.
«Naýryzbaı aýdanyna alǵash barǵan kezimde, "Aqjar", "Tastybulaq" jáne "Shuǵyla" shaǵynaýdandarynyń turǵyndary Áshimov, Taýtaǵan jáne taǵy basqa kóshelerdi jóndeýdi suraǵan bolatyn. Qala ákimdigi jumysty mamyr aıynda bastap ketti." Aqjar" shaǵynaýdanyndaǵy 19 kóshede uzyndyǵy 4,5 km kóshe-jol jelisiniń qurylysy aıaqtaldy. Sondaı-aq, ótken kezdesýde «Alma sıtı-5» turǵyndary Alataý dańǵylyna shyǵa almaıtynyn aıtqan bolatyn. Osy ýchaskedegi jol qurylysyn qyrkúıekke deıin aıaqtaýdy josparlap otyrmyz», - dedi megapolıs basshysy aýdan turǵyndarymen kezdesýde.
Jalpy, bıyl "Aqjar", "Tastybulaq", "Shuǵyla" shaǵynaýdandarynda uzyndyǵy 49 km bolatyn 50 kósheni jóndeý jáne salý josparlanǵan. Osy jumystar qarashaǵa deıin aıaqtalady.
Jaýyn-shashyn jaýǵan kezde, aýdan kóshelerin sý basý problemasy ózekti bolyp qala beredi. Aýdan boıynsha únemi sý basýǵa ushyraıtyn 6 ýchaske anyqtaldy. Osy problemany tolyq sheshý úshin TJ joıý sheńberinde qurylys jumystary bastaldy, olardy aǵymdaǵy jyldyń qarasha aıynda aıaqtaý josparlanǵan.
Oıjaılaý ózeniniń arnasy uzyndyǵy 980 metr nyǵaıtylady, Raıymbek dańǵyly boıynda «Nurly Dala» TK-den Aqsaı ózeniniń arnasyna deıin uzyndyǵy 1400 m burý arnasy jaılastyrylady, Tólebekov, Taljanov, Jadyra jáne Sábdenov kósheleri boıynsha uzyndyǵy 800 m aryq jelisi salynady.
«Sonymen qatar, aǵymdaǵy jyldyń basynan bastap uzyndyǵy 7 km 3 kóshede aryq jelileri salyndy jáne qaıta jańartyldy. Jyl sońyna deıin taǵy uzyndyǵy 3 km bolatyn eki kósheni aıaqtaýdy josparlap otyrmyz», - dep naqtylady qala ákimi Erbolat Dosaev.