Almaty ákimi Erbolat Dosaevtyń halyqpen kezekti kezdesýi Medeý aýdanynda ótti. Qala basshysy aýdannyń damýy jáne turǵyndardan túsken usynystar boıynsha atqarylǵan jumystar týraly aıtyp berdi. Kezdesýge 350-den astam adam keldi, dep habarlaıdy Almaty-akshamy.kz.
Aýdanda ınjenerlik jáne kólik ınfraqurylymyn jańǵyrtý ózekti másele bolyp qala beredi. Búgingi kúni shamamen 6 km sý qubyry jelileri qaıta jańartyldy. Sorǵy stansıalary men "Dýman" shaǵynaýdanynda 1800 tekshe metrge 2 rezervýar salý jumystary jalǵasýda. 2023 jyly "Kólsaı", "Sulýsaı", "Kompot" jáne "Keńsaı" shaǵynaýdandarynda uzyndyǵy 62,7 km sý qubyry jáne káriz jelileriniń qurylysy bastalady.
Jol ınfraqurylymy jáne qaýipsizdik máseleleri boıynsha jyl basynan beri 27,2 shaqyrym jol jóndelip, 18 shaqyrymnan astam trotýar salyndy. Kelesi jyly taǵy 84 shaqyrymǵa jýyq joldar men trotýarlar abattandyrylady. Jyljymaly quramdy jańartý úshin 9 baǵyt boıynsha 100 avtobýs satyp alyndy. Aýdan turǵyndarynyń ótinishi boıynsha Qaldaıaqov kóshesinen «Geolog» baý-baqsha seriktestigine deıingi taǵy bir jańa baǵyt iske qosylady.
Sondaı-aq, qala ákimi aýdannyń qoǵamdyq qaýipsizdigin qamtamasyz etý sharalary týraly habardar etti. Jol boıynda jáne qıylystarda 123 «Sergek» kamerasy ornatyldy, 2023 jyldyń birinshi jartysynda taǵy 58 kamera ornatylady. Azamattardyń qaýipsizdigi úshin aýdanda 213 beınebaqylaý kamerasy jumys isteıdi, jeltoqsan aıynda olardyń sany 355 birlikke jetkiziledi.
Aýdanda turaqty sý basý oryndaryn joıý aıasynda 7 ýchaske boıynsha jumystar aıaqtaldy. Uzyndyǵy 5 km aryq jelileriniń qurylysy bastaldy. Osy joba sheńberinde 2023 jyldyń sońyna deıin 26 kóshege barlyǵy 23,6 km aryq jelisi salynyp, qaıta jańartylatyn bolady.
Ótken kezdesýlerde "Keńsaı" shaǵynaýdanynyń turǵyndary uıaly baılanys pen ınternettiń sapasyn jaqsartý máselesin kóterdi. Búgingi tańda KCELL uıaly baılanys operatorynyń 2 bazalyq stansıasy kúsheıtildi. Beeline jáne Tele2 kompanıalary jyl sońyna deıin 2 stansıa ornatýdy josparlap otyr. Baılanys sapasyn jaqsartý boıynsha "Muztaý" shaǵynaýdanynda da jumystar júrgizilýde.
Oqýshy oryndarynyń tapshylyǵyn azaıtý úshin 520 oqýshy orynǵa arnalǵan qosalqy nysandardyń, eki mektep jáne «Januıa» mamandandyrylǵan keshen qurylysynyń JSQ ázirlenýde. №131 mektepte kúrdeli jóndeý jumystary júrgizilýde.
Medısınalyq qyzmet kórsetýdiń qadamdyq qoljetimdiligin qamtamasyz etý úshin 5 densaýlyq saqtaý obektisiniń (onyń ishinde otbasylyq-dárigerlik ambýlatorıa, emhana, jedel járdem qosalqy stansıasy, aýrýhana) qurylysy boıynsha jumystar júrgizilýde. 2023-2024 jyldarǵa qala ákimdigi "Shyǵys qaqpasy" polısıa ortalyǵynyń aýmaǵynda aýqymdy jobany iske asyrýdy josparlap otyr. Bul onkologıalyq ortalyǵy bar 250 tósektik kópsalaly aýrýhananyń qurylysy.
«Halyq qatysatyn búdjet» baǵdarlamasy boıynsha aýdanda bıyl 19 joba iske asyryldy. Onyń ishinde abattandyrý boıynsha-11, tereń konteınerlerge arnalǵan alańdardy ornatý boıynsha – 8. Kelesi jyly daýys berý qorytyndysyna sáıkes kelip túsken 170 usynystyń ishinen 30 joba irikteldi, onyń ishinde aýla aýmaqtaryn jóndeý – 12, qoǵamdyq keńistikti abattandyrý – 11 jáne tereńdetilgen konteınerlerdi ornatý – 7.
Qoǵamdyq keńistikterdi damytý aıasynda Kishi Almaty ózeniniń terenkýrdaǵy sý aıdynynyń joǵarǵy bóligin memleket menshigine qaıtarý prosedýrasy júrgizilýde. Balansqa qabyldanǵannan keıin bógetti nyǵaıtý jáne almatylyqtardyń súıikti oryndarynyń biriniń aýmaǵyn abattandyrý boıynsha jeke joba ázirlenetin bolady.
Almaty ákimimen kezdesý barysynda turǵyndar joldardy jóndeý, káriz jáne elektr jelilerin abattandyrý jáne t.b. máselelerin kóterdi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýdiń jańa formatyna sáıkes, jyl sońyna deıin Erbolat Dosaev halyqpen 24 kezdesý ótkizdi – 8 aýdannyń árqaısysynyń turǵyndarymen toqsanyna bir kezdesý.