Almaty ákimi Jetisý aýdanyndaǵy ónerkásip kásiporyndarynyń jumysymen tanysty

  • 22:17, 30 tamyz 2025
Almaty ákimi Jetisý aýdanyndaǵy ónerkásip kásiporyndarynyń jumysymen tanysty Almaty ákimdigi

Almaty qalasynyń ákimi Darhan Satybaldy jumys sapary barysynda Jetisý aýdanyndaǵy ónerkásip kásiporyndaryn aralap, olardyń óndiristik qýatymen jáne damý josparymen tanysty.

Alǵashqy nysan – «Kazlegprom-Almaty» JSHS tigin jáne aıaqkıim fabrıkasy boldy. Kásiporyn 1 gektar aýmaqta ornalasqan, óndiristik ǵımarattarynyń jalpy aýdany 12 myń sharshy metrden asady. Jobalyq qýaty jylyna 1 mln jup aıaqkıim men 1,5 mln dana tigin buıymyn shyǵarýǵa múmkindik beredi. Qazirgi tańda fabrıka kúnine 1500 jup aıaqkıim óndiredi.

Fabrıka búginde elimizdiń jeńil ónerkásip salasyndaǵy jetekshi kásiporyndardyń biri sanalady. Zamanaýı qural-jabdyqpen qamtamasyz etilip, jańa tehnologıalar engizilýde. Ónimder ST-KZ standarty boıynsha sertıfıkattalyp, qazaqstandyq qamtý úlesi 52%-dan 93%-ǵa deıin jetedi. Kásiporyn arnaıy jumys kıimderin, áskerı formany, erler men oqýshylarǵa arnalǵan kıimder men aıaqkıim túrlerin shyǵarady. İstiń bastaýynda nebári 30 adam eńbek etse, búginde qyzmetkerler sany 650-ge jetken. Onyń ishinde 50-den astamy – erekshe qajettilikteri bar azamattar.

Qala ákimi Darhan Satybaldynyń aıtýynsha, Almaty úshin jumysshy mamandyqtaryn damytý men qala turǵyndaryna turaqty eńbek oryndaryn ashý – basty mindetterdiń biri.

Keıin qala ákimi «Karina Paper» jáne «PAPIRONE» JSHS kásiporyndarynyń jumysymen tanysty. Bul kompanıalar Qazaqstan men Ortalyq Azıadaǵy qaǵaz ónimderin shyǵaratyn eń iri óndirýshilerdiń qatarynda, olardyń naryqtaǵy úlesi 40–60%-dy quraıdy. Búginde óndiriste 788 adam eńbek etedi. 2024 jyldyń qorytyndysy boıynsha búdjetke 4,9 mlrd teńge salyq tólense, sońǵy úsh jylda bul kórsetkish 12 mlrd teńgeden asty. Osy arqyly atalǵan kásiporyndar Jetisý aýdanyndaǵy eń iri salyq tóleýshilerdiń biri bolyp otyr.

2025 jyldyń qazan aıynda kompanıa jalpy aýmaǵy 43,5 myń sharshy metr bolatyn logıstıkalyq jáne qoıma kesheniniń qurylysyn bastaıdy. Jobanyń quny – 22 mlrd teńge, onyń ishinde 8,5 mlrd teńgesi aksıonerlerdiń óz qarajaty. Joba aıasynda 260 jańa jumys orny ashylyp, jyl saıynǵy salyq túsimi 1,3 mlrd teńgege deıin jetkizilmek.

Sonymen qatar, 2026 jyldyń naýryz aıynda kásiporynda qaǵaz ónimderin shyǵaratyn tórtinshi óndiristik jeliniń qurylysy bastalady. Jobaǵa salynatyn ınvestısıa kólemi – 5 mlrd teńge. Jańa qondyrǵylar óndiris qýatyn arttyryp, eksport kólemin ulǵaıtýǵa jáne 100-den astam jańa jumys ornyn ashýǵa múmkindik beredi.

Aıta ketý kerek, Almaty kásiporyndarynyń óndiristik áleýetin keńeıtý otandyq ónim shyǵarý kólemin arttyrýǵa, ımportqa táýeldilikti azaıtýǵa, eksporttyq múmkindikti nyǵaıtýǵa, búdjet kirisin kóbeıtýge jáne qalanyń turaqty damýyna yqpal etedi.

Sizdiń reaksıańyz?
Unaıdy
0
Unamaıdy
0
Kúlkili
0
Shekten shyqqan
0
Sońǵy jańalyqtar

22:34

22:18

22:17

22:15

13:33

12:05

10:50

10:35

10:23

09:20

08:40

07:41

22:51

22:11

18:46

18:14

17:57

17:51

17:34

17:34

17:34

16:44

16:43

16:36

16:07