Almaty ákimi Darhan Satybaldy jańa oqý jylynyń qarsańynda bilim berý mekemeleriniń daıyndyǵyna arnalǵan jumys keńesin ótkizdi.
Keńes barysynda qalalyq Bilim basqarmasynyń basshysy Saıran Saıfedenov 2025–2026 oqý jylynda Almatyda 353 jalpy bilim beretin uıym jumys isteıtinin habarlady.
Konstıtýsıa kúni men Bilim kúnine oraı qalada jańa mektepter ashylady. «Keleshek mektepteri» jobasy aıasynda 7 jańa mektep paıdalanýǵa beriledi. Jalpy syıymdylyǵy – 12 myń oryn. Olar Terekti, Samǵaý, Qarasý, Aqbulaq, Nurly Dala shaǵynaýdandarynda, sondaı-aq Levıtan kóshesi men Raıymbek dańǵyly, 210 mekenjaıynda ornalasqan. Budan bólek, qyrkúıek aıynyń sońyna deıin taǵy 5 mektep paıdalanýǵa beriledi. Olardyń syıymdylyǵy – 10,5 myń oryn.
Jańa bilim oshaqtaryna 10 889 oqýshy qabyldandy. Oqytý úderisin qamtamasyz etý úshin 693 pedagog jumysqa alyndy. Onyń ishinde 350-i enbek.kz portaly arqyly konkýrs negizinde iriktelgen, 343-i basqa bilim berý uıymdarynan aýystyrylǵan.
Qalanyń oqýshylaryn qamtıtyn «Mektep avtobýsy» jobasy jalǵasýda. Búginde ol 44 memlekettik mekteptiń 7 532 oqýshysyn tasymaldaıdy. Jańa mektepterdiń ashylýyna baılanysty jobaǵa degen suranys artyp otyr.
Bıylǵy Bilim kúnine arnalǵan saltanatty jıyndar 1 qyrkúıekte tek 1-synyp jáne bitirýshi 11-synyp oqýshylary úshin ótedi. Al birinshi synypqa 29 240 bala, 11-synypqa 19 765 oqýshy barady. Qalǵan synyptar úshin 2 qyrkúıekte Bilim kúnine arnalǵan «synyp saǵaty» uıymdastyrylady.
Tehnıkalyq jáne kásiptik bilim berý júıesinde qalada 88 kolej jumys isteıdi. Onda 85 544 stýdent oqıdy. Olarǵa arnalǵan 46 jataqhanada 6 100-den astam oryn qarastyrylǵan. Sonyń ishinde 10 memlekettik kolejdiń janyndaǵy 11 jataqhana 2 200-den astam oryn usynady.
Joǵary bilim berý salasynda Almatyda 35 ýnıversıtet bar. Munda 202 myń stýdent bilim alýda. Olar úshin qalanyń stýdenttik jataqhanalarynda 128 myńnan astam oryn bólingen.