Jaıly qalalyq orta: Shuǵyla shaǵyn aýdanynda balalar jáne sport alańdary bar jaıaý júrginshiler aımaǵy paıda bolady
Almaty ákimi Erbolat Dosaev jumys sapary barysynda jáne Naýryzbaı aýdanynyń turǵyndarymen kezdesý kezinde «Halyq qatysatyn búdjet» baǵdarlamasy aıasynda salynǵan balalar jáne sport alańdary bar jaıaý júrginshiler aımaǵynyń qurylysymen tanysty, dep habarlaıdy aqshamnews.kz
Naýryzbaı aýdanynyń negizgi jobalarynyń biri — Shuǵyla shaǵyn aýdanynyń 10 myń turǵyny úshin demalatyn orynǵa aınalatyn jaıaý júrginshiler aımaǵyn salý.
«Biz bul jobany ózimiz usyndyq. Mine, búgin biz ony júzege asyrýdyń qalaı júrip jatqanyn kóremiz. Bizdiń úılerdiń turǵyndary úshin bul úlken oqıǵa bolady. Ár kesh saıyn kóńildi serýen quratyn bolamyz», - dep atap ótti osy aýdanda turatyn áıel.
Qoǵamdyq keńistikke uzyndyǵy 350 metrlik jaıaý serýendeý alańy, balalar oınaıtyn, sonymen qatar, basketbol, vorkaýt alańdary jáne amfıteatr kiredi. Búkil aýmaqta kóshe jıhazdary men shaǵyn sáýlet pishinderin ornalastyrý, sondaı-aq avtomattandyrylǵan sýarý júıesin jáne kóshe jaryqtandyrý baǵanalaryn ornatý josparlanýda. Qazirgi ýaqytta aǵashtar, butalar otyrǵyzyldy, gazon jasaldy.
Abattandyrý jobasynyń iske asyrylý barysymen tanysqan Erbolat Dosaev ony aǵymdaǵy jyldyń qarasha aıynyń sońyna deıin aıaqtaýdy, bar kemshilikterdi joıýdy, jaryqtandyrý júıesin qosýdy tapsyrdy.
Óz kezeginde shaǵyn aýdan turǵyndary ákimge eresekter men balalardyń demalýyna qolaıly jaǵdaılar, jaıly jaıaý serýendeý aımaǵy úshin alǵystaryn bildirdi. Olardyń ótinishi boıynsha jaıaý júrginshiler aımaǵynyń boıynda vıdeobaqylaý kameralary ornatylady.
Qala basshysy Almatyda jaıly qalalyq ortany qurý boıynsha belsendi jumys jalǵasatynyn atap ótti.
«Ókinishke oraı, jeke saıabaq aımaǵyn jasaýǵa múmkindigimiz joq qalada biz jaıaý júrginshiler aleıasynyń jobalaryn qoldanamyz. Qalanyń barlyq aýdandarynda osyndaı tartylys aımaqtary paıda bolady. Elorda turǵyndary men qonaqtaryna merekelik kóńil - kúı syılaý úshin olardy jańa jylǵa bezendiremiz», - dedi Erbolat Dosaev.
Aǵymdaǵy jyly Almatyda «Halyq qatysatyn búdjet» jobasyna 18,8 mlrd teńge bólindi, bul ótken jylmen salystyrǵanda 5,8 mlrd teńgege artyq. Qala turǵyndary aýlalardy, qoǵamdyq keńistikterdi abattandyrý, sport jáne oıyn alańdaryn qurý boıynsha 364 jobany usynýǵa jáne iske asyrýǵa múmkindik aldy.
