Almaty ákimi Darhan Satybaldy shahardaǵy ınvestısıalyq ahýaldy jaqsartýǵa jáne kásipkerlik bastamalardy qoldaýǵa baǵyttalǵan negizgi dıalog alańy – ınvestısıalyq shtabtyń otyrysyn ótkizdi.
Jıyn barysynda ınvestorlar men salalyq basqarma basshylary arasynda ashyq ári syndarly dıalog ótti. Qatysýshylar qazir júzege asyrylyp jatqan jobalar, memlekettik qoldaý tetikteri men ákimshilik kedergilerdi eńserý joldaryn keńinen talqylady.
Shtab aıasynda óńdeý ónerkásibi, farmasevtıka, elektrondyq saýda jáne logıstıka salalaryndaǵy, onyń ishinde sheteldik kapıtaldyń qatysýmen júzege asyrylatyn 9 ınvestısıalyq joba qaraldy. Jalpy quny shamamen 339 mıllıard teńge bolatyn joba sheńberinde 9 myńnan astam jańa jumys ornyn ashý kózdelip otyr. Jobalar smetalyq qujattamany ázirleýden bastap qurylys jumystaryna deıingi ártúrli satyda. Ásirese, ınfraqurylymmen qamtamasyz etý men jobalardy mejeli merzimde iske qosý máselesine erekshe kóńil bólindi.
Jıyn qorytyndysy boıynsha ár jobaǵa jaýapty tulǵalar bekitilip, ákimshilik tosqaýyldardy joıý jóninde naqty tapsyrmalar berildi. Investısıalyq shtabtyń jumysy turaqty túrde jalǵasady.