Almaty ákimi Erbolat Dosaevtyń qala turǵyndarymen kezekti kezdesýi Bostandyq aýdanynda ótti. Qala basshysy aýdannyń damýy jáne turǵyndardan túsken usynystar boıynsha atqarylǵan jumystar týraly aıtyp berdi. Kezdesýge 200-den astam adam keldi, dep habarlaıdy almaty-akshamy.kz
Bostandyq aýdany úshin eń ózekti máseleler ınjenerlik komýnıkasıalardy modernızasıalaý, jol jáne áleýmettik ınfraqurylymdy damytý, qoǵamdyq keńistikterdiń bolmaýy jáne jalpy aýdandy abattandyrý bolyp tabylady.
Erbolat Dosaev qalanyń ońtústik bóligin energıamen jabdyqtaý sapasyn arttyrý úshin «Almagúl» sh/a elektr qosalqy stansıasy salyndy jáne uzyndyǵy 4,8 km jańa kabel jelileri salynǵanyn atap ótti. Aǵymdaǵy jyldyń maýsym aıynda qosalqy stansıany iske qosý aýdannyń 200 myńǵa jýyq turǵynyn úzdiksiz elektrmen jabdyqtaýmen qamtamasyz etedi.
Sondaı-aq maýsym aıynda "Ermensaı", "Remızovka", "Kókshoqy" shaǵynaýdandarynda 47,2 km elektr jelilerin qaıta jańartýǵa kirisedi. Jumystardy aıaqtaý 2024 jyldyń sáýirine josparlanǵan.
Aýdanda jol ınfraqurylymyn damytý ózekti másele bolyp qala beredi. Aýdanda jalpy uzyndyǵy 28 km bolatyn 24 kósheni ortasha jóndeý josparlanǵan. Jumys mamyr aıynda bastalyp, qarasha aıynda aıaqtalady. Aǵymdaǵy jóndeý jumystary úshin bıyl aýdanǵa 250 mln teńge berildi ári 16,5 myń m² joldy jóndeý josparlanǵan.
Jazda Esentaı ózeni arqyly ótetin kópirdi rekonstrýksıalaý bastalady, erekshe qajettilikteri bar adamdarǵa arnalǵan qurylǵylary bar 2 jaıaý kópir salynyp, pandýs ornatylady.
Aýdannyń mektepteri men mektepke deıingi uıymdarynda oryn tapshylyǵy problemasyn júıeli sheshý úshin 9200 oryndyq 6 jańa mektep jáne 980 oryndyq 4 balabaqsha, sondaı-aq 400 oryndyq 8 jekemenshik balabaqsha salý josparlanǵan. Onyń ishinde «Jaıly mektep» jobasy boıynsha aǵymdaǵy jyldyń qyrkúıek aıynda 3 mekteptiń qurylysyn bastaý josparlanýda.
Qala qadamdyq qoljetimdilik tujyrymdamasy aıasynda sapaly medısınalyq qyzmet kórsetý máselelerine erekshe nazar aýdarady. Aǵymdaǵy jyly 5 densaýlyq saqtaý nysanyn salý, rekonstrýksıalaý jáne kúrdeli jóndeý, onyń ishinde árqaısysy 500 oryndyq 2 emhana jáne 500 tósek-oryndyq qalalyq ortalyq klınıkalyq aýrýhananyń jańa korpýsyn salý josparlanǵan.
Aýdanda únemi sý basý oryndary máselesi belsendi túrde sheshilýde. TJ jelisi boıynsha problemalyq 6 ýchaske joıyldy. Aǵymdaǵy jyldyń sońyna deıin 89 kóshede uzyndyǵy 55,2 km aryq jelilerin rekonstrýksıalaýdy aıaqtaý josparlanýda, bul sý tasqyny kezeńinde sý basý qaýpin joıýǵa nemese azaıtýǵa múmkindik beredi. Qaýipsizdik máseleleri dástúrli túrde basymdyqqa ıe. Vıdeomonıtorıng júıeleriniń jelisin keńeıtý úshin aýdanda qosymsha 750 kamera ornatylatyn mekenjaılar tizimi anyqtaldy.
Aýdannyń 18 km jaryqtandyrylmaǵan kóshelerine 751 jaryqtandyrý baǵanasyn ornatý jumystary aıaqtaldy. Taǵy 42 jaryǵy joq kósheni jaryqtandyrý úshin JSQ ázirleý josparlanǵan.
Ákimmen ótken turaqty kezdesýler barysynda turǵyndar jaıly qalalyq ortany damytý jóninde tilekterin bildirdi. Osyǵan baılanysty «Iýjnyı» parkiniń memlekettik menshikke qaıtarylǵan bóligin abattandyrý jalǵastyrylatyn bolady. Sondaı-aq, turǵyndardyń jaıly turýy úshin 4 qoǵamdyq keńistikti, atap aıtqanda, Úlken Almaty jaǵalaýyn, sondaı-aq «Suńqar» shańǵy tramplınderiniń halyqaralyq keshenine irgeles aýmaqty abattandyrý josparlanýda.
«Halyq qatysatyn búdjet» baǵdarlamasynyń tabysty tájirıbesi qala ákiminiń osy baǵdarlamany iske asyrýǵa qosymsha qarjylandyrý bólý týraly sheshimine yqpal etti. Bostandyq aýdanyna 875 mln teńge bólindi. Aýdan turǵyndarynan 100 usynys kelip tústi, jobalardy irikteý rásimi 1 mamyrǵa deıin aıaqtalady.