Aıt meıramy namaz oqýmen bastalady. Paıǵambarymyz (s.ǵ.s.) ósıetinde: «Aıt kúni birinshi oryndaıtynymyz – namaz oqý», – delingen. Aıt namazy dinimizdiń urany bolǵandyqtan, Paıǵambarymyz (s.ǵ.s.) ómirinde ony bir ret te qaldyrmaı oqyǵan.
Aıt namazy – eki rákat. Jamaǵatpen jarıa túrde oqylady. Azan men qamat oqylmaıdy. Imam: «Eki rákat Aıt namazyna nıet ettim», – dep nıet etedi.
Al jamaǵat: «Eki rákat Aıt namazyna nıet ettim, uıydym ımamǵa» dep nıet etedi. «Allahý ákbar» dep, ıftıtah (ashý, bastaý) tákbiri alynady. Qoldar baılanyp, ımam men jamaǵat birge qupıalaı «Sýbhanaka Allahýmma» duǵasyn oqıdy. Odan keıin ımam jarıalaı, jamaǵat qupıa túrde «Allahý ákbar» dep, úsh ret tákbir aıtady. Árbir tákbirdi aıtqanda, qoldar joǵary kóterilip, eki janyna túsiriledi. Árbir tákbirdiń arasynda úsh tásbıh aıtylatyndaı sát turady. Úshinshi tákbirden keıin qoldar baılanyp, ımam «Á’ýzý» men «Bısmıllahty» qupıalaı, odan keıin «Fatıha» men qosymsha súreni jarıalaı oqıdy. Osydan keıin jarıalaı «Allahý ákbar» dep rúkúǵ pen sájdege barady. Jamaǵat ta qupıalaı tákbir alyp, ımamǵa uııdy. Sodan keıin ekinshi rákatqa bastaıdy. Imam qupıalaı – «Bısmıllah», jarıalaı – «Fatıha», sodan keıin qosymsha súre oqıdy. Mine, osydan keıin osy jerde alǵashqy rákattaǵydaı úsh ret tákbir alady. Budan keıin ımam jarıalaı, jamaǵat qupıa túrde «Allahý ákbar» dep, rúkúǵ pen sájdege barady. Odan keıin otyryp, «áttahıat», «salaýat», «rábbáná» duǵalary oqylyp, eki jaqqa sálem beriledi. Iaǵnı bul aıt namazdarynyń árbir rákattarynda úsh qosymsha tákbir bar. Bul tákbirler – ýájip.
Qutpashy aıt namazdarynyń artynan minberge shyǵyp, tike turyp, jumadaǵydaı eki qutpa oqıdy. Aıt qutpalary tákbirmen bastalyp, jamaǵat ta osy tákbirge jaılap qosylady. Juma namazyndaǵy súnnetter munda da – súnnet. Mákrúh bolǵan nárseler bul jerde de – mákrúh. Aıt qutpasynyń namazdan buryn oqylýy – mákrúh.
Imam birinshi rákatta aıt tákbirlerin umytyp, «Fatıhany» oqyp jatqanda esine tússe, dereý tákbirlerdi alyp, «Fatıhany» qaıta oqıdy. Biraq «Fatıha» men Qurandy oqyǵannan keıin esine tússe, tek qana tákbirlerdi alady. Qaıta oqýdyń qajeti joq.
Aıt kúni momyn musylmandar namazdan soń bir-birin qushaqtap, quttyqtaıdy.