Almaty ákimi Erbolat Dosaevtyń halyqpen kezekti kezdesýi Bostandyq aýdanynda ótti. Qala basshysy aýdannyń damýy jáne turǵyndardan kelip túsken usynystar boıynsha atqarylǵan jumystar týraly aıtty. Kezdesýge 300-den astam adam keldi, dep habarlaıdy Almaty-akshamy.kz
Qala ákimi Erbolat Dosaev atap ótkendeı, Bostandyq aýdanynyń negizgi problemasy jappaı jáne núkteli qurylys bolyp qalýda. Sońǵy jyldary aýdanda turǵyn úı qurylysynyń qarqyny áleýmettik nysandar qurylysynan áldeqaıda asyp tústi. Búginde Bostandyq aýdanynda belsendi qurylystyń 6 alańy bar.
Máseleni júıeli sheshý úshin maýsym aıynda qala qurylysy reglamentine tolyqtyrýlar engizildi. Nátıjesinde Abaı dańǵylynan ońtústikke qaraı jáne ál-Farabı dańǵylynan soltústikke qaraı 9 qabatqa deıingi turǵyn úılerdiń qabattylyǵy shektelip, áleýmettik nysandar salý boıynsha mindetti talap engizildi. Qurylystyń jańa erejeleri boıynsha jumys bastalyp ketti.
Erbolat Dosaev aýdan turǵyndaryn alańdatyp otyrǵan qurylys jumystaryn jeke atap ótti.
«Mega Alma-Ata» SOSO aýmaǵyndaǵy turǵyndardy áleýmettik nysandarmen qamtamasyz etý úshin saıabaq aımaǵy bar 500 kelýshige arnalǵan emhana qurylysyna jer telimi satyp alyndy. Ál-Farabı-Gagarın dańǵylynda 1000 oryndyq mektep, Ál-Farabı-Radostoves dańǵylynda 120 oryndyq balabaqsha salý josparlanýda. Qurylys 2024 jyly aıaqtalady.
Aǵymdaǵy jyldyń qazan aıynda ADK aýdanynda «Akvarel» TK-de árqaısysy 150 oryndyq 2 balabaqsha ashylady. 2023 jyldyń ekinshi jartysynda 900 oryndyq mektep, 180 oryndyq balabaqsha, polısıa pýnkti men skverdiń qurylysy bastalady. Qyrkúıekte №65 mektep janynan 300 oryndyq qosalqy nysan qurylysy bastalady, aıaqtalý merzimi kelesi jyldyń 1 qyrkúıegine deıin.
№2 avtopark aýdanynda qurylys salýshy «BI group» JSHS turǵyn úı kesheni qurylysynyń jobasyn túzetýde, ol 900 oryndyq mektepti, 300 oryndyq balabaqshany, 1,2 ga jasyl aımaqty qamtıtyn bolady, bul rette turǵyn úı kesheniniń qabattylyǵy 9 qabattan aspaıdy.
Sátbaev-SHagabýtdınov aýdanynda buryn osy aýmaqta 11 úıi bar 2 TK qurylysy qarastyrylǵan bolatyn. Búginde qurylys salýshy jobany qaıta qarap jatyr. Úıler sanyn 11-den 5-ke deıin qysqartý josparlanýda. Bosatylǵan aýmaqta aýdany 1 ga saıabaq, skver, turaq jáne ákimshilik ǵımarattar bolady.
Abaı dańǵyly boıynsha Almaty qalasynyń qurylýyn qoldaý aıasynda qurylys salýshy Abaı dańǵyly boıyndaǵy 20 lınıa-Myńbaev-Kárimov-Abaı dańǵylynyń sharshy alańynda shamamen 60 sotyq jer ýchaskesin satyp alý týraly Memorandýmǵa qol qoıdy. Bul aýmaqta qurylys salýshymen birlesip balabaqsha, promenadtyq aımaq, sportpen aınalysýǵa arnalǵan alań, balalar alańy, skver salý josparlanýda.
«Rams city» TK qurylys salýshy – burynǵy jemis konservi kombınatynyń aýdany boıynsha úıler sanyn 57-den 37-ge deıin azaıtý úshin jobany qaıta qarady. Bul rette joba áleýmettik nysandardyń qurylysymen tolyqtyryldy: 1100 oryndyq mektep, ýchaskelik polısıa pýnkti, árqaısysy 120 oryndyq 2 balabaqsha. Budan basqa, qurylys salýshy ýchaskeniń soltústik jáne ońtústik jaǵynan abattandyrý jáne kógaldandyrý úshin shamamen aýdany 1,3 ga jer ýchaskelerin alyp qoıý rásimin júrgizedi.
Qala basshysy turǵyndardyń ótinishi boıynsha Iýjnyı saıabaǵyndaǵy jer telimin qaıtarý jumystary júrgizilip jatqanyn aıtty. 19 sáýirde osy ýchaskeni qaıtaryp alý týraly qaýly qabyldandy, biraq onyń ıesi ótemaqy somasymen kelispeıdi. Sondyqtan ákimdik ekonomıkalyq sotqa memlekettiń qajettiligi úshin jer ýchaskesin májbúrlep alý týraly talap-aryz berdi. Oń sheshim qabyldanǵan jaǵdaıda «Iýjnyı» saıabaǵynyń aýmaǵy 2,8 ga ulǵaıady.
Ákim turǵyndardy áleýmettik ınfraqurylymmen qamtamasyz etý jumystarynyń barysymen tanystyrdy. Aýdan mektepterinde oqýshy oryndarynyń tapshylyǵyn tómendetý úshin maýsym aıynda №146 lıseı men №191 mektep janynan árqaısysy 300 orynnan 2 qosymsha qurylystar aıaqtaldy. 1 qyrkúıekke deıin 275 oryndyq №125 mektepke qosymsha nysan paıdalanýǵa beriledi. Sonymen qatar, Almaty ákimdigi «Ádilet» kolejiniń ıeligindegi 600 oryndyq №94 mektep alańynyń bir bóligin satyp aldy. Osy jyldyń sońyna deıin balalar tolyqqandy mektepte oqýǵa kirisedi.
Erbolat Dosaev sondaı-aq sapaly medısınalyq qyzmet kórsetýdi qamtamasyz etý úshin árqaısysy 500 kelýshige arnalǵan 2 emhana salý josparlanǵanyn habarlady. Olardy engizý qoldanystaǵy júktemelerdi 30 myń adamǵa azaıtady.
Erbolat Dosaev atap ótkendeı, buryn ótken kezdesýde múmkindigi shekteýli adamdar úshin jerústi jaıaý júrginshiler ótkelinde lıftiler men pandýstardyń qoljetimdiligi máselesi kóterilgen bolatyn. Kóktemde jer ústi jáne jer asty ótkelderin tekserý barysynda 2 aqaýly kótergish anyqtaldy. Lıftiler men kótergishterdi aǵymdaǵy jóndeýge bıyl 6 mln teńge bólindi. 1 qarashaǵa deıin qalpyna keltirý jumystary aıaqtalady. Kótergishterge qoljetimdilik úshin ámbebap kiltter jasaldy, olar barlyq júgingen adamdarǵa beriledi.
Ákim turǵyndardy ınjenerlik ınfraqurylym máseleleri boıynsha jumys barysymen tanystyrdy. Ál-Farabıdiń ońtústiginde, «Ermensaı» shaǵyn aýdanynda turatyn halyqty sapaly aýyz sýmen qamtamasyz etý úshin tazartý qurylǵylary salynady. «Nurlytaý» shaǵynaýdanynda sýmen jabdyqtaý jáne sý burý boıynsha JSQ ázirlenýde. «Nurlytaý» boıynsha jelilerdiń árqaısysynyń uzyndyǵy 50 km. Bul aýyz sýmen aýdannyń 10 myń turǵynyn qamtamasyz etedi.
Erǵojın, Gandı kýóshelerinde, "Orbıta-4" shaǵyn aýdanynda uzyndyǵy 1,6 km jylý jelilerin qaıta jańartý júrgizilýde. Bul 546 kóp páterli turǵyn úıge, 20 bilim berý obektisine jáne 12 densaýlyq saqtaý obektisine úzdiksiz jylý berýdi qamtamasyz etedi.
Taǵy bir ózekti másele - jol ınfraqurylymyn damytý jáne abattandyrý. Alǵashqy kezdesý kezinde turǵyndar ákimge Asqarov jáne Bıokombınatskaıa kóshelerine jóndeý jumystaryn júrgizýdi surady. Búginde tańda bul jumystar oryndaldy
Sonymen qatar, 65 kósheniń aǵymdaǵy jóndeý jumystary aıaqtalyp, jalpy aýdany 8 248 sharshy metr bolatyn ári uzyndyǵy 14,5 km 17 kóshede ortasha jóndeý jumystary bastaldy, tamyz aıynan bastap 4 kósheniń asfáltyn aýystyrý josparlanýda.
Bıyl «Halyqtyń búdjetke qatysýy» jobasy aıasynda 800 mln.teńgege 21 joba júzege asyrylýda. Búginde 11 nysan boıynsha jumystar bastaldy. Barlyq jobalar 1 qarashaǵa deıin aıaqtalady. Sondaı-aq, jyl sońyna deıin 80 aýla aýmaǵyna kúrdeli jóndeý júrgiziledi
Aýdan boıynsha 6 sý basý ýchaskesi anyqtaldy, olar aǵymdaǵy jyldyń sońyna deıin TJ jelisi boıynsha joıylatyn bolady, 2023 jyldyń sońyna deıin 60 km aryq jelilerin qaıta qurý jáne salý josparlanýda.
Kezdesý barysynda qala ákimi jol qozǵalysy qaýipsizdigi - eń mańyzdy jáne ózekti máselelerdiń biri ekenin atap ótti. Halyqtyń qaýipsizdigin qamtamasyz etý úshin aýdanda 99 «Sergek» kamerasy, adamdar kóp jınalatyn jerlerde Almaty qalasy PD JBO-ǵa shyǵarylǵan 110 beıne monıtorıń júıesi ornatylǵan. Jyl sońyna deıin 40 beınebaqylaý kamerasy ornatylady.
Almaty ákimimen kezdesý barysynda turǵyndar joldardy, káriz jáne elektr jelilerin jóndeý, abattandyrý jáne t.b. máselelerdi kóterdi.
Memleket basshysy Qasym-Jomart Toqaevtyń Jarlyǵymen bekitilgen halyqpen kezdesýlerdiń jańa formatyna sáıkes, jyl sońyna deıin Erbolat Dosaev 8 aýdannyń turǵyndarymen toqsanyna bir-bir kezdesýden - barlyǵy 24 kezdesý ótkizedi.