Bolashaqta aýdanda emhanalar sany artady.
Jyl sońyna deıin Almatynyń Bostandyq aýdanynda «Balalarǵa shuǵyl medısınalyq kómek kórsetý ortalyǵynyń» jańa korpýsynyń qurylysy aıaqtalady. Bul týraly qala ákimi Erbolat Dosaev aýdan turǵyndarymen bolǵan kezdesý barysynda aıtty, dep habarlaıdy Almaty-akshamy.kz.
Ákimniń aıtýynsha, «Balalarǵa shuǵyl medısınalyq kómek kórsetý ortalyǵynyń» tórt qabatty jańa korpýsyn zamanaýı qabyldaý bólmesi, reanımasıa, operasıalyq jáne neırohırýrgıa bólimshesi men tolyq jabdyqtalǵan zerthana bolady.
Qala ákimi Erbolat Dosaev Almatynyń Bostandyq aýdanynyń turǵyndaryna aýdandaǵy medısınalyq-sanıtarlyq kómekti qalaı damytatynyn aıtty.
Onyń sózine júginsek, atalmysh aýdanda 7 jeke menshik emhana bar, onda 53,5 myń turǵyn tirkelgen (árbir jeke menshik emhanaǵa 2-den 10 myń adamǵa deıin). Ál-Farabı dańǵylynyń ońtústigine qaraı 2 otbasylyq-dárigerlik ambýlatorıa ornalasqan, olar 26 myń adamǵa qyzmet kórsetedi. Sondyqtan, barlyq júkteme memlekettik emhanalarǵa túsedi.
«Ál-Farabı dańǵylynan joǵary turatyn halyqqa sapaly medısınalyq qyzmet kórsetý úshin biz 500 kelýshige arnalǵan emhana qurylysyna jeke menshikten jer ýchaskesin satyp alý úshin kelissózder júrgizip jatyrmyz. 15 mamyrǵa deıin emhana salynatyn jerdi anyqtaımyz jáne jyldyń sońyna deıin jobalaý-smetalyq qujattamany ázirleýdi aıaqtaýdy josparlap otyrmyz», - dedi qala ákimi.
Aýdandaǵy 3 memlekettik emhanada oryn joq, bul qyzmet kórsetý sapasyna, kezektilikke keri áser etedi.
Anyqtama úshin: №4 emhanada esepte turǵandar sany - 88 860, № 12 emhanada - 63 545, № 17 emhanada – 83 301. 7 emhanada – 53 200.
Jalpy, Bostandyq aýdanynyń turǵyndaryna memlekettik tapsyrys boıynsha jumys isteıtin 28 medısınalyq uıym qyzmet kórsetedi. Qala qaramaǵynda 10 stasıonar jáne 4 emhana bar, olarǵa 286 myń halyq tirkelgen.