Almaty qalasy ákimdiginde qala ákimi Darhan Satybaldynyń tóraǵalyǵymen azamattardy jeke qabyldaý ótti, dep habarlaıdy aqshamnews.kz
Kezdesý barysynda turǵyndar baspana, komýnaldyq ınfraqurylym, kólik qatynasy, jer qatynastary, densaýlyq saqtaý jáne qurylys salasyndaǵy zańdylyq máseleler kóterdi.
Ásirese áleýmettik osal toptar – zeınetkerler, jalǵyzbasty analar men búdjettik sala qyzmetkerleriniń ótinishterine erekshe nazar aýdaryldy. Turǵyn úı bólý jáne «Otbasy bank» elektrondy platformasy arqyly kezekke qoıý júıesin jetildirý máseleleri talqylandy.
Sonymen qatar elektr energıasynyń turaqsyz berilýi men komýnaldyq qyzmetterdiń sapasyna qatysty ótinishter qaraldy. Ákimniń tapsyrmasymen tıisti basqarmalar men energetıkalyq kompanıalar elektr jelilerin qala menshigine tezirek qabyldap, úzdiksiz elektrmen qamtýdy qamtamasyz etý baǵytynda sharalar qabyldaıdy.
Alataý jáne Medeý aýdanyndaǵy qurylys nysandarynyń zańdylyǵyn tekserý boıynsha tapsyrma berildi. Sondaı-aq qalalyq mobıldilik basqarmasyna kólik qatynasyn jáne jol qozǵalysy qaýipsizdigin jaqsartý boıynsha usynystardy qaraý tapsyryldy.
Budan bólek, shaǵyn bızneske arnalǵan jer telimderin bólý jáne turǵyndardy qajetti dári-dármekpen qamtamasyz etý máseleleri de talqylandy.
«Ár ótinishtiń artynda naqty adam men onyń ómirlik jaǵdaıy tur. Sondyqtan barlyq másele jeke baqylaýyma alyndy», – dedi qala ákimi Darhan Satybaldy.
Aıta keteıik, azamattardy jeke qabyldaý turaqty túrde ótkizilip keledi. Onyń maqsaty – halyq pen atqarýshy bılik arasyndaǵy ashyq dıalogty qamtamasyz etý. Sonymen qatar qala ákimi kún saıyn aýdandarǵa shyǵyp, turǵyndarmen kezdesip, berilgen tapsyrmalardyń oryndalýyn óz baqylaýynda ustaıdy.