Jumys sapary aıasynda Erbolat Dosaev Túrksib aýdanynda ornalasqan «Almaty-1» bazaryn jańǵyrtý jumystarynyń barysymen tanysty.
Búginde qalada saýda qyzmetin retteý týraly Zańǵa sáıkes 33 bazar jańǵyrtyldy, taǵy 9-ynda 2025 jylǵa deıin jumys aıaqtalýǵa tıis.
«Almaty-1» bazary 1938 jyldan bastap jumys isteıdi. Aýdany 7 myń sharshy metr, onda jylytý jáne ınjenerlik jelige qosylmaǵan konteınerlik tıptegi 570 saýda núktesi bar. Ótken ǵasyrdyń 40-50-shi jyldarynda salynǵan bazar ǵımarattary tozǵan jáne qaýipsizdik standartyna sáıkes kelmeıdi.
Bazardy jańǵyrtý aıasynda saýdagerler men kelýshiler úshin sonyń ishinde tez buzylatyn ónimderdi saqtaýǵa jáne jylýmen qamtamasyz etýge arnalǵan tońazytqysh kameralary úshin qolaıly jaǵdaı jasalady. Sondaı-aq jobada lıftter, eskalatorlar, jer asty jáne jer ústi avtoturaqtar, meıramhana aýlasy, jaıaý júrginshiler aımaǵy jáne t.b. kózdelgen.
Búginde birinshi korpýstyń birinshi jáne ekinshi qabattarynyń metal qańqasy turǵyzyldy. Eden aralyq beton quıý aıaqtaldy. Qazirgi ýaqytta baspaldaq salynyp jatyr. Avtonomdy gaz qazandyǵyn montajdaý jumystary bastaldy.
Qala ákiminiń tapsyrmasyna sáıkes, saýdagerler konteınerlerden kóshiriletin birinshi korpýstyń qurylysy osy jyldyń sońyna deıin aıaqtalýǵa tıis.
Jalpy, keshenge azyq-túlik jáne kıim-keshek bazarlary, jalǵa alýshylarǵa arnalǵan oıyn alańdary, meıramhanalar, ákimshilik bólim, halyqqa qyzmet kórsetýge arnalǵan basqa da aımaqtar, tıeý-túsirý kireberisteri, jer asty parkıngi kiredi. Jeke ınvestısıalardyń jalpy somasy 7,3 mlrd teńgeden asady.