Almatyda qańtar oqıǵasynda zaqymdanǵan qala ákimdiginiń ǵımaratyn rekonstrýksıalaý aıaqtaldy.
Ǵımaratty qalpyna keltirý jumystary Memleket basshysynyń tapsyrmasy aıasynda 2022 jyldyń aqpan aıynda bastaldy, dep habarlaıdy almaty-akshamy.kz.
Esterińizge sala keteıik, ǵımaratqa órtten 80% zalal keldi, 6 qabat pen 4 pavılon otqa oranǵan, jertóleler órtke qarsy júıeniń iske qosylýy men tonaý saldarynan joǵarǵy qabattan sý aǵyp, zardap shekti.
Almaty ákimdigi ǵımaratynyń tarıhı kelbeti saqtalyp, zamanaýı tehnologıa men qurylys standarty eskerilip jańǵyrtyldy. Qasbette juldyzdyń ornyna beıbitshilik tutastyǵynyń, memleket pen otbasy negiziniń ulttyq sımvoly bolyp tabylatyn shańyraq beınelengen.
Rekonstrýksıa kezinde birinshi kezekte ákimdik qyzmetkerleri men kelýshileriniń qaýipsizdigi eskerildi. «QazQSǴZI» AQ sarapshylary ǵımaratty seısmıkalyq tózimdilikke zerttep, usynys aıtty, seısmıkalyq kúsheıtý boıynsha barlyq is-shara tolyq kólemde júrgizildi, órt qaýipsizdigi sharalary saqtaldy. Ǵımarattyń ishki bezendirilýinde otqa tózimdi janbaıtyn materıaldar paıdalanyldy, buryn bolmaǵan jańa tútin shyǵarý júıesi, órttiń mekenjaı júıesi-eskertý ornatyldy. Órt kezinde órttiń taralýyna jol bermeıtin arnaıy klapandar avtomatty túrde qosylady.
Ǵımarattyń qaýipsizdik sharalaryn kúsheıtý úshin ǵımaratqa kirýdi baqylaý júıesi qoldanyldy jáne otqa tózimdi esikter, ǵımaratqa birinshi qabattardyń terezeleri arqyly ruqsatsyz kirýdi shekteıtin qosymsha japqyshtar, sonymen qatar ár qabatta jáne perımetri boıynsha beınebaqylaý kameralary ornatyldy. Qyzmetkerlerdiń kirýi úshin týrnıket qurylǵysynda taný júıesi ornatylǵan.
Qurylys barysynda tıimdi energıa tutyný tehnologıasy qoldanylyp, jańa jylytý júıesine tolyǵymen aýystyryldy. Barlyq ınjenerlik komýnıkasıa avtomattandyrylǵan jáne biryńǵaı dıspecherlik pýnktke qosylǵan, bul jumysty baqylaýǵa jáne ǵımarattyń energıa tıimdiligin qamtamasyz etýge múmkindik beredi. Dıspecherler ozyq úlgidegi stansıanyń kómegimen barlyq júıeni basqarady, tótenshe jaǵdaı týyndaǵan kezde jedel áreket etedi.
Ǵımaratty qalpyna keltirýdiń taǵy bir mańyzdy krıterııi ınklúzıvti sheshimderdi engizý arqyly azamattardyń barlyq sanaty úshin jaılylyq pen kedergisiz ortany qamtamasyz etý edi. Atap aıtqanda, múmkindigi shekteýli jandarǵa arnalǵan jedel satylar, elektr kótergishter, múgedekterge arnalǵan jýynatyn bólmeler jáne qozǵalýy qıyn adamdarǵa arnalǵan arnaıy qurylǵy – tańbalaý, pandýstar, shaqyrý túımeleri, Braýl álipbıi paıda boldy. Ákimdiktiń birinshi qabaty «Open space Almaty» bolyp qaıta jańartyldy – bul qabyldaý bólmesi, kútý aımaǵy, kelissózder bólmesi, halyqty qabyldaý bólmesi, ana men bala bólmesi, balalarǵa arnalǵan oıyn alańy bar qoǵamdyq qabyldaý bólmesi.
Rekonstrýksıadan keıin kabınetterdiń aýdany ózgermedi. Otandyq óndiristi qoldaý úshin negizinen qazaqstandyq óndiristiń materıaldary, onyń ishinde jıhaz jáne esikter paıdalanyldy. Kabınetterdiń konfıgýrasıasy, ólshemderi, ornalasýy ózgerissiz qaldy. Ǵımaratta barlyǵy 700 orynǵa eseptelgen 360 kabınet ornalasqan. Nysannyń jalpy aýdany 33 myń sharshy metrden asady. Ǵımaratta 14 basqarma men ákimdik apparaty bolady. Osylaısha, Almaty ákimdiginiń ǵımaraty qalpyna keltirildi, paıdalanýǵa daıyn.