«Almaty» Áleýmettik-kásipkerlik korporasıasy BUU-nyń jahandyq kelisim shartyna (UN Global Compact) qosyldy. Bul adam quqyqtary, eńbek qatynastary, qorshaǵan ortany qorǵaý jáne sybaılas jemqorlyqqa qarsy kúres salasyndaǵy turaqty damý qaǵıdattary men qundylyqtardy saqtaýdy bildiredi.
«Bul bastamaǵa qosylý «Almaty» ÁKK-nyń óz qyzmetinde BUU jahandyq kelisim shartynyń on ýnıversaldy qaǵıdatyn dáıekti engizýge beıim ekenin rastaıdy. Olardyń ishinde adam quqyqtaryn saqtaý, qorshaǵan ortany qorǵaý, sybaılas jemqorlyqqa tózbeýshilik jáne basqa da qaǵıdattar bar. Qatysýshylardyń qyzmeti ornyqty damý salasyndaǵy áleýmettik maqsattar men múddelerge qoljetkizý úshin biryńǵaı tásilderdi qoldanýǵa baǵyttalǵan», – dedi «Almaty «ÁKK» AQ Basqarma tóraǵasy Arman Shamshın.
Ózine qabyldaǵan mindettemeler aıasynda áleýmettik-kásipkerlik korporasıa jyl saıyn BUU-nyń jahandyq kelisim sharty qaǵıdattaryn saqtaý salasyndaǵy óz jumysynyń nátıjeleri týraly esep beretin bolady.
Aǵymdaǵy jyly «Almaty» ÁKK qoǵam men qorshaǵan orta aldyndaǵy jaýapkershiligin kórsete otyryp, korporatıvtik basqarýǵa jáne ornyqty damýǵa erekshe nazar aýdarady. Osy aýqymdy bastamaǵa qosylý ÁKK ózin klıentter, ınvestorlar jáne basqa da múddeli taraptar úshin áleýmettik jaýapty jáne etıkalyq uıym retinde kórsetýge múmkindik beredi.
Eske salsaq, BUU-nyń jahandyq kelisim sharty korporatıvtik áleýmettik jaýapkershilik jáne turaqty damý salasyndaǵy álemdegi eń aýqymdy erikti bastama bolyp tabylady. Búginde ol álemniń 160 elinen 20 000-nan astam qatysýshyny biriktiredi.